Despues di trinta aña yen di pashon, dedikashon i hopi influensia den mundu di arte na Kòrsou, Lusette Verboom, e sintí tras di galeria Alma Blou, a anunsiá su despedida.
Durante e añanan aki Verboom ku su galeria a krea un sitio úniko kaminda artista lokal por a mustra nan kreashonnan i kaminda amantenan di arte mundialmente por a atmirá e talento ekstraordinario di Kòrsou.
Remarkabel
Tempu ku Verboom den añanan nobenta a drenta e esena di arte di Kòrsou, e tabata remarkabel. “Mi a haña mi den un mundu ku tabata sinti manera un klup privá, partí nan grupo. Komo hende muhé koló skur mi tabata un eksepshon”, e ta kompartí.
E deskubrimentu di talento lokal
Na kuminsamentu literalmente Verboom a subi kaya, buskando artista na merkadonan lokal i den diferente bario. Nos tabata kore rònt den outo pa mira kiko tabatin i ken tabata aktivo”, Verboom ta konta. “Asina nos tabata haña talento nobo.”
Transformashon di Landhuis Habaai
Na aña 2005 Verboom i su kasá a kumpra un landhuis dekaí, no opstante e riesgonan finansiero grandi. “Tur hende a bisa nos ta loko, pero nos a perseverá. Nos a hinka tur nos sèn den Landhuis Habaai, ku a bira e base nobo pa Galeria Alma Blou.”
Esaki nan a hasi ku yudansa di un arkitekto i ku sosten di hopi amigu di komunidat (artístiko). “Si bo a kore pasa den e temporada ei, bo por a mira no solamente trahadó, sino tambe amigu i artista ta yuda fèrf, karga kos, bari i pone kos na òrdu.”
E paso oudas aki a habri un kapítulo nobo pa e mundu di arte kurasoleño. Landhuis Habaai di un ruina a transformá pa un sitio di enkuentro animá pa kreatividat, kaminda artista i amante di arte di rònt mundu tabata topa otro. Asina e landhuis a bira e kurason di e esena di arte na e isla, un kriadero pa inisiativa nobo.
Perseveransia i dedikashon
E añanan ku a sigui tabata un tempu yen di reto, tantu personal komo profeshonal, espesialmente ora na aña 2017 su mama a bira hopi malu Verboom a kontemplá pa stòp. “E tempu ei kaba nos a pone e landhuis na benta un bia. Pero sinembargo pa stòp no tabata e sintimentu korekto”, Verboom ta rekonosé.
No opstante un hipotek pisá i insiguridat di futuro, el a disidí pa sigui. Esaki no a mustra solamente su determinashon sino tambe su konekshon profundo ku arte i kultura di Kòrsou.
Herensia i inspirashon
Awendia ta mira Verboom komo un pionero ku a renobá e esena artístiko lokal. Su relato ta mustra e impakto di perseveransia i vishon i e influensia ku un solo persona por tin riba henter un komunidat. “Arte por kambia mundu, i mi ta gradesido ku mi por a kontribuí algu na esaki” e ta finalisá.
Plan pa futuro i generashonnan nobo
Miéntras ku e ta prepará su mes pa un futuro ku ainda ta den e seña di arte i kultura, Lusette Verboom ta keda un fuente di inspirashon pa hopi hende, tantu na Kòrsou komo fo’i tera. “E tempu a yega pa pasa e maneho pa otro hende. Mi esposo entretantu a hasi ochenta aña i ainda nos ta salú. Nos tin un kas presioso i nos ke bai disfrutá di esaki.”
