Un grupo di 40 mucha outista na Kòrsou ku nunka ántes no a partisipá na enseñansa, e aña eskolar 2024/2025 ku a start 15 di ougùstùs, ta kuminsá skol, na Skol Myrna Dovale. E skol a añadí un sekshon nobo ku awor ta hasi posibel pa e muchanan aki por kuminsá haña enseñansa.
Skol Myrna Dovale, ta enfoká riba enseñansa pa muchanan ku problema ouditivo i di abla. Ounke ku e divishon nobo no ta solamente pa muchanan outista, pero tambe pa otro alumnonan ku tin problema ouditivo i abla, e divishon nobo lo ta representá den su mayoria pa muchanan outista.
Kalidat di skolnan
Nihayra Leona, direktor di Skolnan DOS ta splika ku semper na Kòrsou tabatin e keho ku no tin skolnan adekuá pa muchanan ku tin nesesidat spesial. Último añanan tabatin remarke tambe tokante dje kalidat di skolnan.
Mientrastantu a tuma lugá introdukshon di un divishon nobo spesialmente pa muchanan ku tin problema ku oido i abla na Skol Myrna Dovale. Leona ta remarká, ku outismo ta un di e estorbonan ku ta kai bou di e problemanan aki.
E úniko kos ku e muchanan outista ku e aña aki ta kuminsá skol na Skol Myrna Dovale, a risibí te ainda tabata terapia. Awor ta warda nan un situashon di un otro tipo di struktura i espektativa. Arginia Lucio, kabes di skol di Skol Myrna Dovale ta splika ku debidamente e terapia ku e muchanan outista a risibí ta di hopi balor.
Enseñansa spesial
E direktor di DOS a añadí na e remarkenan di Arginia Lucio, ku ta manda muchanan lat na un skol spesial ta relashoná tambe ku e tradishon sikológiko, pa determiná presis, si e mucha mester risibí enseñansa spesial. “Ta warda un ratu wak kon e ta funshoná den enseñansa regular i despues ta kuminsá hasi tèst.”
E muchanan outista ku e aña aki ta drenta Skol Myrna Dovale pa di promé bia, ta prinsipalmente esnan ku tin outismo tipo 2. E grado di outismo aki ta rekerí mas yudansa na momentu di risibí enseñansa. E mucha ku tin outismo tipo 2 tin mester di un sosten mas regular i konsistente.
Ta trata di trata di muchanan ku inteligensia di IQ 55 te ku 69. E mucha aki for di tempran i pa semper mester haña di guia adishonal’. Arginia Lucio ta splika dikon den sierto kaso, e ZMLK regular no ta sufisiente pa e grupo aki.
A base dje situashon aki, tabatin deliberashon ku entre otro DOS i Autism Aid Foundation, ku a indiká ku e grupo di muchanan outista ku mester di yudansa ta bira grandi. A yega na e konklushon ku na Skol Myrna Dovale por traha riba e grupo aki den konstelashon chikí di klas.
Lista di espera
Pa otro aña tin un lista di espera kaba, na Skol Myrna Dovale, pa un lugá na e sekshon spesial di e skol. A skohe pa kuminsá muchu grandi, pa krea espasio pa kaminda ta nesesario eventualmente, hasi adaptashon i eliminá e asina yamá: ‘Kinderziektes’.
Lucio: ‘’Nos ta trahando hopi duru riba dje, pa introdusí esaki den enseñansa na nos skol tambe’’. Direktor di DOS, Nihayra Leona a menshoná posibel kolaborashonnan den futuro ku organisashonnan spesialisá riba e tereno aki.
Enkanto e maestronan di Skol Myrna Dovale ku ta bai traha na e sekshon nobo, Arginia Lucio a menshoná e preparashon ku nan a risibí, i tambe informashon ku nan a haña durante dje konferensia inisial pa aña eskolar 2024/2025 ku a tuma lugá resientemente. Konsientemente a move e maestronan ku tin hopi eksperensia trahando ku e grupo di outista, pa e sekshon nobo.
