Ku tristesa e isla Kòrsou ku duele ta tuma despedida di un di su personanan mas stimá, Dinah Veeris. Nasé dia 20 di aprel 1939, Dinah a lanta bira un pionero den e área di konosementu di yerba i medisina natural. Su herensia i influensia ta ankrá den e kultura i e tradishonnan di Kòrsou i lo keda sigui biba hopi tempu. El a fayesé dia 4 di sèptèmber.
Wardadó di konosementu masha bieu mes
Dinah a dediká su bida na e wardamentu i ekspanshon di e konosementu di siglonan di yerba kurativo ku pa generashonnan largu kaba tabata usa pa kura enfermedat i malesa. Na aña 1991 el a habri su famoso hardin di yerba ‘Den Paradera’ na e parti ost di Kòrsou.
E hardin ta kontené sentenar di palu lokal, mata i yerba medisinal. E nòmber ‘Den Paradera’ ta referí na e indjannan Paraguiri, ku ántes tabata manehá un kura di yerba den e área aki.
Dinah a sigui un estudio na California School of Herbal Studies na Estádos Unídos i for di 1981 a investigá e karakterístikanan kurativo di yerba i e tradishonnan medisinal di Kòrsou. E tabata entrevistá hopi habitante di edat pa dokumentá nan konosementu i warda esaki pa e futuro generashonnan.
E investigashon aki a resultá den un tesoro grandi di konosementu tokante remedi natural di e isla. Na aña 2000 a koroná Dinah ku e Premio Colá Debrot pa su empeño i kontribushon na kultura i naturalesa di Kòrsou.
E laso ku Kòrsou i naturalesa
Segun Dolph van Stapele, un bon amigu i bisiña ku konos’é hopi aña kaba i ku ta biba riba su tereno tambe, Dinah tabata hopi mas ku un kurandero natural. “Nos tabata bisiña, nos tabata hasi kos huntu i nos tabata emprendé huntu. E tabata masha bon amiga.”
Su serkania i su empatia segun Dolph tabata hasié hopi stimá serka tur hende ku tabata konos’é. Su hardin no tabata solamente un sitio di trabou, sino tambe un sitio di konekshon kaminda hende tabata sinti ku ta mira nan i ta respetá nan.
Van Stapele ta enfatisá ku Dinah su trabou tabata ankrá profundamente den e kultura di e isla: “E tabatin hopi maestro di e islanan i a tuma e konosementu ei ofer i a praktiká e mes. Ta asina lokal, asina puru di e isla.”
E laso profundo aki ku e kultura lokal ta hasi su trabou outéntiko i úniko. Su konosementu di yerba tabata rekonosé i respetá internashonalmente.
Empatia i aksesibilidat
Banda di su konosementu ensiklopédiko di yerba kurativo, Dinah tabata tambe un persona aksesibel i yen di amor. “Den su presensia bo tabata sinti bo mirá, skuchá, sintí i respetá”, Van Stapele ta rekordá. Su personalidat habrí i kaluroso tabata hasié stimá serka hende rònt mundu.
Ta seka e yerbanan na Den Paradera tradishonalmente i ta prosesá nan den produkto natural trahá na man. Bishitante por kumpra e produktonan aki, manera te i krema, den e tienda ku ta den e kurá. E kurá ta habri pa bishitante i ta duna gira i tratamentu segun sita.
Ounke Dina no ta presente mas físikamente, su herensia ta sigui biba den e konosementu ku el a pasa. Van Stapele ta konta: “El a traha henter un archivo di yerba i konosementu lokal ku sin dje berdaderamente lo a bai pèrdí.” Su trabou a sòru pa un apresio renobá pa e tradishonnan medisinal di Kòrsou, i lo sinti su influensia pa generashonnan largu.
Ku su fayesimentu Kòrsou ta pèrdè un pionero, un kurandero, i un amiga stima. Pero su hardin i su trabou lo sigui biba komo un fuente di inspirashon, konosementu i kuramentu.
