Lysanne van Heijningen, partera i fundadó di e práktika Mirasoon na Kòrsou, ta para na frente di un lucha hurídiko i burokrátiko kontra Sociale Verzekeringsbank (SVB) na Kòrsou. Su eksperensia ta revelá kon SVB ta stroba hende muhé na estado den nan libertat di eskoho relashoná ku nan embaraso i parto.
No opstante ku despues di un kaso den korte Van Heijningen a haña un pèrmit pa traha komo partera independiente, SVB ta nenga di kompensá su servisionan. Esaki ta nifiká ku hende muhé na estado na Kòrsou no tin e libertat di skohe unda i kon nan ke laga guia nan parto.
“E monopolio di e klínika di maternidat ta nifiká ku hende muhé no por skohe mas unda nan ke risibí nan kuido. Esaki ta bai kompletamente kontra e eskoho liber di e hende muhé”, segun Van Heijningen.
E maneho di SVB, kaminda solamente ta sera kòntrakt ku e klínika di maternidat, ta stroba e parteranan independiente manera Van Heijningen di duna kuido pa hende muhé ku ta sigurá na SVB. Esaki ta pone ku e hende muhénan ku ke hasi uso di su servisionan den e posishon ku ta nan mes mester paga p’esaki.
Libertat di eskoho
E maneho di SVB no solamente parse inhustu, sino posiblemente tambe ta bai kontra legislashon oropeo. Kòrsou komo parti de Reino Hulandes ta kai bou di e Tratado Oropeo di Derecho Humano (EVRM).
Artíkulo 8 di e tratado aki ta protehá e derecho riba un bida privá i di famia, loke tambe ta enserá e libertat di skohe unda i bou di ki sirkunstansia un hende muhé ta duna lus. A konfirmá esaki den e sentensia di Korte Oropeo pa Derecho Humano den e kaso di Ternovszky v. Hungaria (2010).
Den e veredikto ei a husga ku hende muhé tin e derecho di skohe e sitio di parto nan mes i ku e estadonan mester fasilitá e derecho aki. Banda di esaki Korte di Hustisia Union Oropeo ta rekonosé Yu di Kòrsou komo siudadano di Union Oropeo a base di e aresto Eman i Sevinger (2006). Esaki ta nifiká ku e derechonan di siudadano oropeo, entre nan libertat di eskoho di kuido, ta aplikabel tambe na Kòrsou.
Gobièrnu ta obligá di fasilitá e eskohonan aki, inkluso e kompensashon finansiero di kuido di partera, irespekto si esaki tuma lugá den un ambiente klíniko òf den un konsultorio privá. Pa nenga supsidio igual pa parto klíniko òf parto na kas ta bai kontra di esaki.
Un lucha largu
Van Heijningen a kuminsá su lucha hurídiko despues ku na prinsipio e no a haña pèrmit pa habri su konsultorio. “Nos no tabata haña oido”, el a splika. Ta te numa despues di un kaso den korte ku a dura sigur dos aña, el a haña e pèrmit pa traha komo partera independiente.
Tòg SVB ta keda ninga di kompensá su servisionan. Esaki ta nifiká ku hende muhé ku ke bishitá su ofisina, mester paga esaki kompletamente nan mes, miéntras ku ta kompensá e klínika di maternidat kompletamente.
No opstante e viktoria hurídiko e opstrukshon kontinuo di SVB ta sinti manera un limitashon di e outonomia di hende muhé na Kòrsou. Van Heijningen ta desididu di kontinuá e lucha aki. “Nos ta keda lucha pa un trato respetuoso i e mihó eksperensia di parto posibel pa tur hende muhé na Kòrsou”, e ta bisa.
Pakiko kambio ta nesesario
E limitashonnan ku SVB ta imponé, ta bai mas leu ku solamente e trabou di Van Heijningen. E ta toka e esensia di e derechonan di hende muhé na Kòrsou, espesialmente nan derecho riba outonomia durante embaraso i parto.
“Ta trata di hopi mas ku solamente mi práktika”, van Heijningen ta enfatisá. “Ta un asuntu di e derechonan fundamental pa hende muhé.”
