Den su novela estreno ‘De Barmhartige Staat’ (E Estado Miserikòrdioso) Etienne Ys ta invitá lesadó pa mira sklabitut i poder na un manera diferente, pa medio di bòltu e papelnan ku a hunga. Den e reino imaginario aki ta e oropeonan ta oprimí, i asina e lesadó ta eksperensiá e historia for di un perspektiva nobo. Ys, promé minister anterior di Antia Hulandes, pa e relato aki a usa su fasinashon pa historia i su pasado polítiko.
E idea pa e buki a kuminsá dies aña pasá. “Semper mi tabata fasiná pa historia”, Ys konta. “Mi a puntra mi mes si e kos por a kana diferente, i mi ker a investigá esaki den mi buki.” E relato ta sigui un rei ku ke transitá reformashon pa duna pueblo mas derecho, entre nan esnan sklabisá. Su yu hòmber, e prínsipe heredero, ta un forsa tras di e kambionan aki. Pero e rei ta topa ku resistensia den e famia real i for di partinan konservativo di e reino.
Reino Ashanti
Ys a laga e historia riku di reino afrikano oksidental inspir’é, espesialmente e reino di Ashanti. Un biahe pa Ghana a konfirmá su eskoho pa usa e reino aki komo base pa su mundu fiktisio. “Ashanti tabatin un tradishon militar fuerte i tabata grandi den komèrsio”, e ta bisa. Durante su biahe el a haña komprenshon balioso ku a yud’é pa inkorporá detaye históriko den su buki. “E pueblo lokal a duna mi tep i a konfirmá ku mi tabata riba e kaminda bon ku mi eskohonan.”
Su eksperensia polítiko, e tabata promé minister entre 2002 – 2003 i tambe entre 2004 – 2006, a yud’é pa hasi e dinámiko di poder den e novela mas realista. Ys ta konta ku su konosementu di prosesonan polítiko tras di kortina a inspir’é pa duna e tenshonnan entre esnan ku ke reformashon i esnan konservativo forma den e relato.
Loke mi a eksperensiá den polítika tras di muraya, a yuda mi pa deskribí e lucha den reino na un manera kreibel”, e ta bisa. E eksperensia aki a dun’é e posibilidat pa agregá outentisidat na e e konfliktonan den su mundu fiktisio.
Ángulo di enfoke nobo
Ku De Barmhartige Staat Ys ker a tira un lus riba sklabitut for di un punto di bista nobo. “Lástimamente tin sklabitut tur kaminda na mundu i ta mes bieu ku humanidat mes. Pa medio di bòltu e ròlnan, mi ta spera ku e lesadónan por tira un bista ophetivo riba opreshon.”, e ta splika. E ke pa e lesadónan reflehá riba e karakter universal di sklabitut i su konsekuensianan.
De Barmhartige Staat a sali riba 21 di sèptèmber i ta optenibel na libreria na Kòrsou. Miéntras ku e ta gosa di e publikashon, Ys ta intimá ku tin relato nobo na kaminda: “E inspirashon ta sigui bini. Esaki ta djis e kuminsamentu.”
