Korte na Kralendijk a huzga ku e Representante di Reino Jan Helmond a intervení muchu lihé den e problemátika ku sushi na Boneiru. Su desishon pa tuma tareanan di e Kolegio Ehekutivo over, tabata proseduralmente robes, segun e wes.
Na novèmber aña pasá, e Representante di Reino a aktua na lugá di e Entidat Públiko Boneiru pa un solushon pa e problema ku sushi riba e isla. Temporalmente el a tuma e outoridat pa otorgamentu di pèrmit, supervishon i mantenshon na e landfill di Selibon na Lagun over di e Kolegio.
El a hasi esaki pasobra rapòrtnan di e Servisio di Reino pa Karibe Hulandes i di e Inspekshon di Ambiente di Bida i Transporte a atvertí repetidamente pa problemanan di medio ambiente i riesgonan pa salú. E Kolegio no tabata di akuerdo ku e intervenshon i a apelá. Djabièrnè último wes a dikta sentensia den e kaso.
Sentensia
Wes Sander Lanshage ta duna e Kolegio rason parsialmente. Na promé lugá Korte ta rekonosé ku berdaderamente tabatin negligensia di tarea di parti di e Kolegio. Sin embargo, e Representante di Reino mester a duna e Kolegio Ehekutivo un último oportunidat pa tuma akshon e mes, segun e trapi di intervenshon eksistente, ku ta basá riba seis fase di eskalashon.
E Representante di Reino a intervení for di e fase di eskalashon tres, sin mustra promé i di forma kla kua ta e pasonan ku e Kolegio mester a tuma i riba ki término. Pues, proseduralmente el a aktua robes.
Konsekuensia di e sentensia
Pasobra e Representante di Reino tabata prematuro ku su intervenshon, Korte ta destruí e dekreto pa posishonamentu komo remplaso. Tambe e sentensia ta mèldu ku e Representante di Reino mester paga e gastunan di e proseso i di e sekretariado di Korte.
E wes ta hasi un apelashon fuerte pa un mihó kolaborashon entre e Kolegio Ehekutivo i e Representante di Reino, loke ta nesesario pa solushoná e problema ku sushi riba e isla strukturalmente.
Baka a hoga
Pa Jan Verbeek, bosero di e fundashon Pro Lagun, e sentensia a kai ‘ora ku e baka a hoga na pos’. E fundashon ta boga pa e interesnan di e habitantenan den bisindario di e landfill i pa salubridat riba Boneiru.
“E Representante di Reino a aktua ku karakter inmediato komo remplaso, i p’esei e por a tuma algun medida urgente,” Verbeek ta bisa. “Pero, mas ku tur kos: pa nos e kaso hudisial akí no mester a tuma lugá mes. Ta gastamentu di energia i dispidimentu di plaka di impuesto.”
Petishon pa maneho
Verbeek ta kontentu sí, ku awor ta mas kla ku di dia, ku tabatin negligensia di tarea. “Esaki ta pará pretu riba blanku den e sentensia,” e ta remarká. “Tambe tin pará bon kla den e sentensia, ku no a manehá i ku debidamente mester a manehá.”
E sentensia ta kuadra ku e petishon pa maneho ku Pro Lagun a manda un dia promé ku e sentensia pa e direktorado di Supervishon i Maneho di e Entidat Públiko Boneiru, mustrando e direktorado riba su deber pa manehá. Den e petishon ta pidi pa medidanan inmediato i adekuá, entre otro pa para stòrtmentu di sushi sin pèrmit na e landfill di Lagun i pa kita sushi ku a stòrt ilegalmente.
“Te ainda ta bini sushi nobo na e landfill, ku ta wòrdu di stòrt sin niun tipo di planifikashon. Muskita ta bin riba esaki i e peliger di kandela sigur no ta bira ménos. Simplemente mester manehá. Nos mester stòp di oumentá e riesgonan na e landfill i mester bini un investigashon di salubridat. Na mi manera di mir’é, e sentensia di wes akí sigur no ta un viktoria pa e Kolegio Ehekutivo.”
