Djabièrne 21 di mart, Kòrsou ta bai urna. Pa e motibu aki, Caribisch Netwerk a manda dies pregunta di elekshon na e partido politiko ku ta partisipá, riba tema manera ekonomia, bibienda, edukashon i seguridat. MFK i PNP, Movementu Kousa Promé, MAN/PIN i PAR a duna kontesta. KEM, Trabou pa Kòrsou i Mihó Kòrsou no a entrega ningun respuesta, pa esei nan opinionan no ta inkluí.
MFK: ‘Un ekonomia fuerte i sigurudat sosial ta nos prioridat’
Ku mira riba e elekshonnan di 21 di mart próksimo, Ret Karibense a hasi tur e partidonan ku ta partisipá dies pregunta riba temanan importante manera ekonomia, bibienda, enseñansa i siguridat.
MFK ta kompartí su puntonan di bista riba e asuntunan akí.
Empleo i ekonomia
Kòrsou konosé un grado haltu di desempleo, i un dependensia di trabou temporal i di supsidio di gobièrnu. Kiko ta bo plan konkreto pa krea empleo duradero, sin pone mas preshon riba e kaha di gobièrnu?
MFK su enfoke ta pa reforsá e sektor turístiko, diversifiká e ekonomia i duna sosten na startups den e kategoria di empresa mediano i chikitu. “Nos lo krea un infrastruktura pa atraé invershonista i sigi desaroyá e ekosistema turístiko.” Aparte di esaki MFK ke instituí un sistema di garantia pa fiansanan di invershon, i tambe duna coaching na empresario nobo. Ademas mester duna kobradónan di ònderstant entrenamentu i guia ku ta prepará nan pa empleo fiho den sektor privá.
Bibienda
Tin eskases di bibienda pagabel. Kon boso lo atendé esaki?
MFK ta rekonosé e skarsedat di bibienda pagabel i ke amplia konstrukshon di bibienda sosial via Fundashon Kas Popular. “Nos lo sostené invershonista ku garantia di gobièrnu i nos lo hasi palabrashonnan ku fondonan di penshun i ku kompanianan di seguro, pa realisá bibiendanan pagabel.” Banda di esei, gobièrnu lo introdusí regla pa laga e asignashon di bibienda kana di forma hustu i transparante.
Enseñansa i hubentut
Kon enseñansa lo por konektá mihó ku e merkado laboral?
MFK ke sigi ku e implementashon di e Programa di Mehorashon den Enseñansa. “Nos enfoke ta riba mehorashon di e kalidat di enseñansa, digitalisashon, i mantenshon di edifisionan di skol.” Aparte di esaki, e partido ke reforsá enseñansa tékniko i di fishi pa prepará hobennan mihó pa e merkado laboral, ku atenshon spesial pa e sektornan di ICT, kuido i energia duradero.
Salubridat
Gastunan di kuido médiko ta subiendo. Kon boso ke mehorá salubridat públiko?
MFK ke dirigí su mes riba kuido preventivo, ku atenshon pa diabetis, malesanan kardiovaskular i nutrishon salú. “Nos lo habri sentronan médiko ku akseso fásil den áreanan densamente poblá i hasi e situashon finansiero di e hospital general duradero.”
Otro medidanan lo ta pa hasi lista di espera serka spesialista mas kòrtiku i e introdukshon di fail elektróniko pa hasi e kuido mas efisiente.
Siguridat i kriminalidat
Kon boso ke baha kriminalidat strukturalmente?
MFK ta enfatisá prevenshon i kolaborashon ku e komunidat. “Nos ke mehorá siguridat den bario dor di laga polis di bario, organisashonnan di bario i habitantenan traha di forma mas estrecho ku otro.” E partido ta bai pa prevenshon di kriminalidat bou di hubentut ku programanan pa deporte, guia di mèntòr i reintegrashon. Ademas lo usa e Fondo pa Kombatimentu di Kriminalidat aktivamente pa finansiá proyektonan efektivo.
Klima i medio ambiente
Kua medidanan boso partido lo tuma, pa protehá medio ambiente?
MFK ke stimulá desaroyo duradero, hasiendo ehekushon di e Akuerdo di Paris (pa klima) posibel na Kòrsou. “Nos lo mantené leinan mas severo pa medio ambiente, i invertí den proyektonan pa energia duradero, manera di hidrógeno, solo i bientu.” E partido ta boga pa mas resiklahe i un ekonomia sirkular, i ke aktua severamente kontra polushon di medio ambiente riba tera i den laman.
Turismo i ekonomia
Kon boso ke diversifiká ekonomia?
MFK ke desaroyá sektornan nobo di ekonomia, manera energia duradero, agrikultura i teknologia. “Nos lo atraé invershonnan stratégiko pa nos hafnan, i posishoná Kòrsou komo un sentro logístiko, finansiero i teknológiko.” Banda di esei, e partido ke promové eksportashon pa paisnan di Caricom, Colombia i República Dominicana.
Relashon ku Hulanda i outonomia
Kon boso partido ta mira e relashon ku Hulanda, mirando e dependensia finansiero?
MFK ta aspirá pa relashonnan bon i stabil de Reino, basá riba rèspèt pa outonomia i ekivalensia. “E kolaborashon ku Hulanda mester tuma lugá den e kuadronan di e Statudo di Reino i e Areglo di Estado di Kòrsou.” E partido ke reforsá e responsabilidatnan finansiero i gubernamental propio di Kòrsou.
Migrashon i kresementu di poblashon
Kua medidanan boso ke tuma pa regulá migrashon mihó?
MFK ta rekonosé e desafionan di migrashon i ke tuma medidanan ku ta tantu humano komo efektivo. “Nos lo reforsá kontrolnan di frontera i apliká eksigensianan di estadia mas estrikto.” Migrantenan ilegal ku ta kumpli ku e rekisitonan pa un pèrmit di estadia, lo por legalisá nan estadia. Tambe lo pone eksigensianan mas severo pa dunadónan di trabou, pa prevení trabou ilegal.
Provishonnan sosial i kombatimentu di pobresa
Kua ta boso solushonnan struktural pa kombatimentu di pobresa?
MFK ta rekonosé ku un gran parti di e poblashon ta biba bou di e nivel di pobresa, i ke implementá manehopa sostené gruponan vulnerabel. “Nos lo amplia partimentu di kuminda na skol, i fasilidatnan di krèsh i akohida despues di ora di skol, subi e salario mínimo i e AOV, i duna supsidio pa hür i gastunan di energia.” Banda di esaki e partido ke realisá bibienda sosial i introdusí deskuento pa transporte públiko.
MAN-PIN: ‘Pa un ekonomia mas adaptabel i hustu’
Ku mira riba e elekshonnan di 21 di mart próksimo, Ret Karibense a hasi tur e partidonan ku ta partisipá dies pregunta urgente riba temanan importante manera ekonomia, bibienda, enseñansa i siguridat.
MAN-PIN ta kompartí su vishon i plannan pa Kòrsou.
Ekonomia i empleo
Kòrsou ta enfrentá desempleo haltu i un dependensia riba trabou temporal i supsidio.
MAN-PIN ke habri afó ku un ekonomia diversifiká ku ta generá 5.000 kupo di trabou nobo. Invershonnan lo bai pa turismo, energia duradero, logístika marítimo, IT, e sektor kreativo i turismo médiko. Produkshon lokal ta haña un impulso dor di remplasá importashon ku agrikultura, krio di bestia i peska. Benefisionan fiskal ta stimulá inisiativanan duradero, mientras ku reformanan de lei laboral ta duna e trahadó mas siguridat.
Betaalbaar wonen
Tur hende mester por paga un bibienda digno.
MAN-PIN ke pa nunka hür ta tuma mas ku 25% di e entrada, i ta esforsá su mes pa kaba ku lista di espera i konstrukshon di kasnan pagabel. Edifisionan bashí, lo haña un funshon nobo, hende ku entrada abou ta haña akseso na un fondo di hipotek spesial i terenonan ilegalmente habitá ta wòrdu legalisá, pa e habitantenan por invertí den nan futuro.
Enseñansa i merkado laboral
Enseñansa mester konektá miho ku ekonomia.
MAN-PIN ta boga pa reformanan dirigí riba téknika, inovashon i empresariado. Ta amplia trayektonan pa kore stage i studia-i-traha, mientras ku skol- i empresanan ta bai traha huntu di forma mas estrecho. Dunadónan di trabou ta haña insentivo pa finansiá rekapasitashon.
Salubridat i prevenshon
Pa kontené gastunan di kuido ku ta subiendo, e enfoke ta bai kai riba prevenshon.
Barionan lo haña un mihó kuido primario i kuido básiko ta bira aksesibel gratuitamente. ‘Wellness coaches’ lo sostené un estilo di bida salú, mientras ku ‘impuesto riba suku’ (impuesto riba bibida sin alkohòl empaketá, den kua ta pone un òf mas tipo di suku – red.) i un prohibishon di propoaganda pa junkfood ta desenkurashá eskohonan no-saludabel. Produktonan pa menstruashon grátis pa hende ku entrada abou ta sòru pa salú básiko i igualdat.
Siguridat i kriminalidat
Kriminalidat ta pidi pa un aserkamentu sabí.
MAN-PIN ta kombiná prevenshon ku un maneho hudisial efektivo. Prezu ta haña un plan di rehabilitashon personal ku trabou òf edukashon pa promové reintegrashon. Invershon de den téknikanan di investigashon digital i un Ministerio Públiko i polis mas fuerte ta mehorá mantenshon.
Medio ambiente i durabilidat
Kòrsou mester bira mas duradero.
MAN-PIN ta introdusí un maneho di ‘zero waste’ ku separashon estrikto di sushi i reuso. Ta kombatí deforestashon, stimulá agrikultura duradero i ta hasi infrastruktura pa awa i energia duradero. Lo aktua ku man duru kontra stòrtmentu ilegal di sushi.
Ekonomia i turismo
E dependensia di turismo mester baha.
MAN-PIN ta esforsá su mes pa sektornan manera energia renovabel, IT, log’istika i servisionan médiko. Banda di esei mester repartí e entradanan turístiko di forma mas hustu, ku mas sèn kedando na Kòrsou.
Relashon ku Hulanda
Kòrsou su outonomia meresé refuerso.
MAN-PIN ta boga pa relashon den Reino adaptá, kolaborashon mas estrecho ku Aruba i Sint Maarten, i un korte konstitushonal. Programanan legislativo konhunto mester fortalesé Kòrsou su posishon de Reino.
Migrashon i regulashon
Migrashon por ta un enrikesementu, pero mester wòrdu regulá mihó.
MAN-PIN ke reformá e maneho pa stranhero i invertí den mantenshon. Migrantenan pa labor ta haña oportunidat pa kontribuí di forma legal na e ekonomia.
Provishonnan sosial i pobresa
Pobresa ta pidi pa solushonnan struktural
MAN-PIN ke traha ku trahadonan komunitario dirigí riba bario, invertí den krèsh i akohida di mucha pagabel, hasi reforma di penshun, i ofresé bentaha fiskal na hende ku entrada abou. Ta stimulá siguridat di kuminda pa medio di agrikultura lokal i inisiativanan kontra dispidimentu di kuminda.
Movementu Kousa Promé: Onze middelen moeten in lokale handen blijven
Ku mira riba e elekshonnan di 21 di mart próksimo, Ret Karibense a hasi tur e partidonan ku ta partisipá dies pregunta riba temanan importante manera ekonomia, bibienda, enseñansa i siguridat.
Kousa Promé ta presentá su puntonan di bista.
Empleo i ekonomia
Kòrsou konosé un grado haltu di desempleo, i un dependensia di trabou temporal i di supsidio di gobièrnu. Kon boso ke krea empleo duradero, sin pone mas preshon riba e kaha di gobièrnu?
Segun Kousa Promé e medionan ekonómiko di Kòrsou, manera hafnan, aeropuerto, refineria i playanan, mester keda den mannan lokal. Nos mester krea mas empleo desaroyando agrikultura, krio di bestia i peska, pa baha importashon i mantené divisa. Banda di esei nos mester lanta fábrika- i industrianan pa eksportashon. E partido ta boga pa un skol di turismo i ke stimulá fishi i empresanan chikitu.
Bibienda
Tin eskases di bibienda pagabel. Kiko ta boso aserkamentu?
Kousa Promé ke reorganisá FKP i pon’é bou di supervishon di SOAB. Tambe mester bin un inventarisashon di bibienda- i terenonan ku ta pará bashí òf sin terminá. Nos ke stimulá kooperativanan di konstrukshon i hasi finansiamentu mas fásil, pa hobennan por konstruí nan propio kas. Banda di esei mester bini un solushon pa bienes no-repartí, pa herederonan por haña akseso na nan terenonan.
Enseñansa i hubentut
Kon enseñansa lo por konektá mihó na e merkado laboral?
E partido ke instituí un Ofisina pa Planifikashon Ekonómiko i Sosial pa investigá e nesesidatnan di e merkado laboral di manera struktural. Nos mester rekonstruí e skol di turismo i reforsá formashon den e sektor primario. Ademas, enseñansa no mester ta dirigí riba solamente ekonomia, sino tambe riba desaroyo sosial i kultural.
Salubridat
Gastunan di kuido ta subi. Kon boso ke mehorá salubridat?
Kousa Promé ke kambia e enfoke pa e bai kai riba prevenshon. Nos mester prevení malesa pa medio di nutrishon salú, mas posibilidat pa rekreá i informashon na skol i den medionan nashonal. E partido ta boga pa tiendanan sosial di gobièrnu i kooperativo ku ta ofresé komestibel salú. Supervishon estrikto di e industria farmaséutiko i regulashon di botika- i laboratorionan ta esensial.
Siguridat i kriminalidat
Kon boso ke baha kriminalidat strukturalmente?
Empleo i enseñansa ta e yabi pa baha kriminalidat, segun e partido. Si nos krea empleo i enseñansa sano, kriminalidat lo baha. Banda di esei Kousa Promé ke invertí den programanan komunitario i envolvementu sosial pa subi siguridat den bario.
Klima i medio ambiente
Kua medidadan boso partido lo tuma pa protehá e medio ambiente?
Kousa Promé ke instituí un Ofisina di Planifikashon pa kontrolá proyektonan duradero. Nos mester introdusí regulashon mas estrikto kontra polushon, i stimulá resiklahe. Banda di esei e partido ta boga pa fuentenan di energia alternativo i reglanan pa medio ambiente mas estrikto pa kompanianan, meskos ku edukashon na skol i den medionan nashonal.
Turismo i ekonomia
Kon boso ke diversifiká ekonomia?
Segun e partido Kòrsou mester bira ménos dependiente di turismo enfokando mas riba agrikultura, krio di bestia, peska i industria lokal. Nos mester krea kondishonnan pa eksportá produktonan lokal, manera merkansia di fishi, moda i produktonan kultural.
Relashon ku Hulanda i outonomia
Kon boso partido ta mira e relashon ku Hulanda, mirando e dependensia finansiero?
Kousa Promé ke traha den direkshon di outonomia i finalmente independensia. Nos mester reforsá nos ekonomia pa no sigi dependé di fiansanan hulandes. E partido ke logra esaki ku reformanan ekonómiko, medidanan fiskal i kombatimentu di korupshon.
Migrashon i kresementu di poblashon
Kua medidanan boso ke tuma pa regulá migrashon mihó?
E partido ta boga pa kontrolnan di frontera mas estrikto i ménos korupshon den e servisionan di imigrashon. Nos mester reforsá kontrolnan i eliminá abusu den e sistema di imigrashon. Mester hasi un distinshon entre migrashon ilegal i buskadó di asilo, tratando ámbos grupo di forma humano segun tratadonan internashonal.
Provishonnan sosial i kombatimentu di pobresa
Kua ta boso solushonnan struktural pa kombatimentu di pobresa?
Kousa Promé ke tiendanan si gobièrnu ku ta ofresé produktonan básiko na preisnan pagabel. Gobièrnu mester partisipá den e merkado liber pa kontené gastunan di konsistensia. Banda di esaki e partido ta boga pa invershonnan den empleo i industria lokal, pa kontra-arestá pobresa di forma struktural. Ademas Kousa Promé ke bai pa desaroyo mental i kultural komo parti di kombatimentu di pobresa.
PNP: ‘Rumbo pa un ekonomia adaptabel i duradero’
Ku mira riba e elekshonnan di 21 di mart próksimo, Ret Karibense a hasi tur e partidonan ku ta partisipá, dies pregunta riba temanan importante manera ekonomia, bibienda, enseñansa i siguridat.
PNP ta presentá su vishon.
Ekonomia & empleo
Kon boso partido ke krea empleo, sin pone mas preshon riba e kaha di gobièrnu?
PNP ta haña ku Kòrsou mester di un ekonomia ku ta mas fuerte i mas diversifiká. E partido ke invertí mas den sektornan manera turismo, agrikultura, teknologia i energia duradero. Esaki tin ku sòru pa mas trabou permanente. Banda di esei mester bira mas fásil pa kuminsá ku un propio negoshi, pa medio di ménos burokrasia i mas sosten finansiero. Tambe PNP ke laga enseñansa konektá mihó ku e merkado laboral, pa ta mas fásil pa hobennan haña trabou.
Bibienda
Kon boso ke solushoná e eskases di bibienda pagabel?
PNP ke pone mas tereno pa konstrukshon disponibel i aktua di forma mas estrikto kontra spekuladónan ku ta wanta tereno, sin konstruí. Ademas mester bini mas konstrukshon di bibienda sosial, prinsipalmente pa hogarnan ku entrada abou i medio. Gobièrnu mester kontrolá proyektonan di konstrukshon mihó pa prevení korupshon, i mester duna supsidio na empresanan ku ta konstruí kasnan pagabel.
Enseñansa & hubentut
Kon boso lo soru pa enseñansa konektá mihó ku e merkado laboral?
Enseñansa mester bira mas dirigí riba práktika i konektá mihó ku e profeshonnan di futuro. PNP ke mas kursonan tékniko i ke adaptá e sistema eskolar di tal manera ku ménos hoben ta kai afó sin diploma. Tambe mester bini mas atenshon pa deporte, arte i müzik na skol, pa e hobennan por desaroyá nan mes di forma mas amplio.
Salubridat
Kon boso ke mehorá salubridat sin ku primanan ta subi?
PNP ke dirigí su mes riba prevenshon, manera nutrishon salú i deporte, pa prevení malesa. Banda di esei e kuido mester ta mas efisiente, por ehèmpel usando fail digital di pashènt i ku mihó kolaborashon entre dunadó di kuido. Gobièrnu mester sòru tambe pa remedinan mas barata dor di kumpra mas sabí i stipulá preis máksimo pa sierto remedi.
Siguridat & kriminalidat
Kua medida boso lo tuma pa baha kriminalidat di forma struktural?
PNP ke ekipá polis mihó i sòru pa mas polis den bario. Tambe mester bini mas atenshon pa hobennan ku ta kore riesgo di kai den kriminalidat, dor di ofresé nan formashon i trabou. Ademas gobièrnu mester aktua mas duru kontra krimen organisá i labamentu di plaka. Teknologia sabi, manera supervishon ku kámara na sitionan di riesgo, mester yuda ku kombatimentu di krimen.
Klima & medio ambiente
Kua medida pa medio ambiente boso ke introdusí?
PNP ke mas energia renovabel, manera energia di solo i di bientu, i mihó prosesamentu di sushi. Tambe mester aktua di forma mas estrikto kontra polushon di medio ambiente. Mester protehá palu- i matanan mihó, i fangu awaseru na un manera mas utilisabel. Aparte di esakinan, mester bini regulashon pa protehá kosta i playanan mihó.
Turismo & ekonomia
Kon boso ke hasi e ekonomia ménos dependiente di turismo?
PNP ke invertí den otro sektor, manera agrikultura, teknologia i e industria kreativo. Esaki kier men ku lo bini ku mas sosten pa empresario lokal i startups. Kòrsou tin ku bira un Smart Nation tambe, kaminda teknologia i inovashon ta atraé profeshonnan nobo i invershon.
Relashon ku Hulanda & outonomia
Kon realístiko mas outonomia ta, mirando e dependensia finansiero?
PNP ta haña ku Kòrsou mester traha huntu ku Hulanda riba terenonan manera enseñansa, siguridat i ekonomia. A la bes e isla mester bira mas independiente finansieramente dor di fortalesé su ekonomia i manehá gastunan di gobièrnu mihó. E relashon ku Hulanda mester ta basá riba ekivalensia i rèspèt mutuo.
Migrashon & kresementu di poblashon
Kua medida boso ke tuma pa regulá migrashon mihó?
PNP ke mihó kontrol di frontera i reglanan kla tokante ken por biba i traha na Kòrsou. Mester atendé ku trabou ilegal, pero na un manera humano. Hende ku tin hopi tempu ta traha na Kòrsou i ku ta aportá na e komunidat, mester haña un oportunidat hustu pa legalisá nan mes. Simultáneamente mester hasi palabrashon ku paisnan den regio pa regulá e migrashon mihó.
Provishonnan sosial & kombatimentu di pobresa
Kua solushonnan struktural boso partido tin pa kombatimentu di pobresa?
PNP ke sòru pa mas hende haña trabou dor di laga e ekonomia krese i stimulá empresanan pa krea kupo di trabou. Provishonnan sosoal mester ta dirigí riba hende ku realmente mester di nan. E partido ke sostené bankonan di kuminda tambe i dunanan edukashon finansiero, pa hendenan siña anda mihó ku sèn. Fuera di eseinan, gobièrnu i empresanan mester invertí den krèsh i akohida pa mucha pagabel, pa mayornan por traha.
PAR: ‘Kolaborashon ta e yabi pa un Kòrsou adaptabel’
Ku mira riba e elekshonnan di 21 di mart próksimo, Ret Karibense a hasi tur e partidonan ku ta partisipá, dies pregunta riba temanan importante manera ekonomia, bibienda, enseñansa i siguridat.
PAR ta kompartí su vishon.
Empleo i ekonomia
Kòrsou konosé un grado haltu di desempleo, i un dependensia di trabou temporal i di supsidio di gobièrnu. Kon boso ke krea empleo duradero, sin pone mas preshon riba e kaha di gobièrnu?
PAR ta kere ku kolaborashon entre gobièrnu, mundu di negoshi i siudadania ta krusial. E partido ke invertí den sektornan manera ekonomia blou, fintech (teknologia pa duna servisionan finansiero) i ekonomia sirkular. Tambe ke bai pa desaroyo di Schottegat komo un kompleho multi-industrial i pa stimulá produkshon i eksportashon lokal.
Bibienda
Tin eskases di bibienda pagabel. Kua ta boso aserkamentu?
PAR ke aselerá proseduranan pa erfpacht, stimulá konstrukshon di bibienda sosial i promové solushonnan inovativo pa konstrukshon di kas, manera bibienda modular. E partido ta boga pa gastunan di notario mas abou pa medio di areglonan di erfpacht i publikashon di e lei OZB (onroerendezaakbelastingen, impuesto konforme e balor di e inmueble) pa baha gastunan di bibienda.
Enseñansa i hubentut
Kon enseñansa lo por konektá mihó ku e merkado lanoral?
PAR ta esforsá su mes pa mihó ahuste den Reino i métodonan di enseñansa moderno manera Teach them young i Transformational learning. E partido ke mas brede scholen i reforsá kursonan tékniko, pa hobennan ta mihó prepará pa e merkado laboral.
Salubridat
Kon boso ke mehorá salubridat sin oumento di prima?
Prevenshon ta esensial. PAR ta boga pa mas informashon tokante nutrishon i estilo di bida salú, supsidio pa deporte i moveshon, i lantamentu di tres sentro di kuido pa hisa e aksesibilidat. Banda di esei ta hasi esfuerso pa mihó infrastruktura i mas spesialista pa eliminá eskases.
Siguridat i kiminalidat
Kua medidanan boso lo tuma pa baha kriminalidat strukturalmente?
PAR ke reforsá e kapasidat di polis i invertí den community policing i prevenshon den bario. Ademas ta amplia programanan pa hubentut i redanan sosial, i ta hasi uso di teknologia manera supervishon ku kámara i análisis di data.
Klima i medio ambiente
Kua medidanan pa medio ambiente boso partido ta bai introdusí?
PAR ke amplia sistemanan pa fangu awaseru, mehorá kuido di kosta, i kombatí bashamentu ilegal di awa sushi den laman. E partido ta hasi esfuerso pa sistemanan di sèn pa envase i empake (‘statiegeld’), resiklahe, energia duradero i mihó mantenshon di leinan pa medio ambiente.
Turismo i ekonomia
Kon boso ke diversifiká e ekonomia?
Banda di turismo PAR ke esforsá su mes pa agrikultura duradero, un hub di alimento, Naast toerisme wil PAR inzetten op duurzame landbouw, een voedselhub, fintech i desaroyo di Kòrsou komo un sentro pa ekonomia blou. Ta implementá kompanianan di gobièrnu di forma mas aktivo den e desaroyo ekonómiko stratégiko.
Relashon ku Hulanda i outonomia
Kon boso partido ta mira e relashon ku Hulanda?
PAR ta aspirá un Reino mas fuerte ku kolaborashon mas intensivo riba tereno di finansas, edukashon i inovashon. E partido ke aseleramentu di e ehekushon di e Pakete di Pais i mas invershon den kolaborashon institushonal den Reino i den Union Europeo.
Migrashon i kresementu di poblashon
Kua medidanan boso ke tuma pa regulá migrashon mihó?
PAR ta boga pa un trayekto di legalisashon regulá pa migrantenan laboral dokumentá ku ta aportando na e ekonomia. Aparte di esei, mester tin kontrol mas estrikto di frontera i mester atendé ku abusu di e sistema di migrashon.
Provishonnan sosial i kombatimentu di pobresa
Kua solushonnan struktural boso partido tin pa kombatimentu di pobresa?
PAR ke duna supsidio pa bibienda, transporte públiko i akohida pa mucha despues di skol. Tambe ta baha impuesto riba merkansia esensial i ta promové produkshon lokal pa kontené inflashon. Fuera di esakinan, e partido ke pasa pa un sistema di impuesto mas hustu, ku ta baha e peso di impuesto i ta stimulá kresementu ekonómiko.
