Bou di e título di: ‘Barionan pober ta keda den problema añ’aden, añ’afó‘, Ret Karibense ta dediká atenshon na desaroyo di e barionan pober na Kòrsou. E intenshon ta pa ilustrá kiko a kambia a traves di añanan pa e barionan akí. Na e okashon akí nos ta dediká atenshon na e bario di Seru di Papaya (Ser’i Papaya).
Añ’aden, añ’afó Barionan pober ta keda sin haña atenshon, ku e konsekuensia ku e situashon den e barionan akí ta bira mas deplorabel. Un programa di kombatimentu di pobresa algun aña pasá ku no a finalisá, falta di kontinuashon di e proyekto ku mester a trese alivio, inkumplimentu di promesanan di yudansa, a pone ku mientrastantu un bario mas ku otro a sigi kai mas hundu den pobresa.
Shani Bitorina, ta trahado sosial i habitante di Ser’i Papaya. E ta manehá aktividat- i proyektonan den e bario. Ta konsiderá Ser’i Papaya un di e barionan hopi pober di Kòrsou, entre otro pasobra mayoria habitante ta biba bou di e asina yamá ‘armoedegrens’. Kasi tur e habitantenan ta kobra sea pinshon ‘i behes òf ònderstant so, òf nan ta gana un salario mínimo. E habitantenan akí su entrada ta ménos ku e mínimo ku un persona mester pa por sovreviví.
Shani Bitorina. Foto: Dulce Koopman
Segun Bitorina, esei ta pone ku e famia kompleto ta kai den desbalanse. Muchanan ta stòp di bai skol na edat abou i ta bai traha pa yuda kumpli ku e nesesidatnan ku e kas tin. Bitorina: ‘No ta trata di kosnan luho, pero kosnan básiko manera kuminda, paña, internèt, awa ku koriente i transporte pa skol.’ Konsekuensia di e situashon aki ta kaimentu tempran for di e sistema di enseñansa pa resultá den prostitushon, trafikashon di droga i formashon di gèng.
Bario peligroso
Despues di subi e seru ku ta kondusí na Ser’i Papaya, bo ta drenta un área di kas di pueblo, ku na promé bista ta reflehá un bario trankil. E sentimentu ku bo ta den un asina yamá ‘bario peligroso’, no ta apoderá di bo. E stèmpel di ta peligroso, Ser’i Papaya a haña pasobra den pasado ku regularidat tabatin aktonan di violensia serio na ‘bisiña’ Seru Fortuna.
Djis despues di e entrada di e bario, tin e Sentro di Bario ku, a pesar di no ta risibí sufisiente sosten finansiero ni material serka e instansianan ku ta responsabel pa esakinan, ta den un estado aseptabel.
Loke ta duna e bario un bista hopi deskuidá i sushi, ta restunan di e skol Dòdò Palm ku a sera algun aña pasá pa falta di sufisiente alumno. Mientrastrantu a kombertí e skol den un landfill ilegal. E situashon di e kasnan ta varia. Tin algun kas ku habitantenan a drecha i modernisá, pero ta bisto ku mayoria di e kasnan tin retraso serio den mantenshon.
Situashon mental
Un di e aspektonan di e pobresa den bario, ta e situashon mental di e famianan. Komo profeshonal Bitorina ta rekonosé i konstatá ku den vários bario pober, famianan kompleto ta kai bou di e asina yamá kategoria di ‘Licht Verstandelijk Beperkt’, ku ta enserá ku nan tin un limitashon mental. Loke ku ta un problema grandi, ta e echo ku e habitantenan akí no ta risibí e yudansa i guia ku nan tin mester.
Audio 1 Shani
Banda di na Seru di Papaya, Bitorina ta funshoná tambe na nivel di pais. Tin diferente bario ku tin problema idéntiko na esun di Seru di Papaya. Por konkluí ku e problemátika di pobresa i e situashon mental di e habitantenan ta un problema di pais Kòrsou. Esaki ta rekerí atenshon urgente di trahadónan sosial i tambe guia pa famia, na nivel di pais.
Audio 2 Shani
Vários partido polítiko ta indiká den e dianan akí ku nan tin nos barionan na pechu. Segun Bitorina, tumando na kuenta ku nos ta den temporada di kampaña di elekshon, si polítikonan ta konsiente ku ta trata di un problema nashonal, bienestar di barionan mester bira un punto di nan plan di gobernashon. Pa loke ta konserni Ser’i Papaya, Bitorina a traha e plan: ‘Wijkverbetering Seru di Papaya’ (Mehoransa di bario Seru di Papaya).
Audio 3 Shani
Sentronan di bario
Un bon funshonamentu di sentronan di bario tambe por kontribuí na kombatimentu di pobresa den e barionan. Pero tin diskrepansia grandi entre e sentronan di bario. Bitorina: ‘Na Seru di Papaya, nos tin nuebe aña sin un trahadó sosial, un conciërge òf un kuidadó di interior. Pa medio di kreatividat propio nos por a tene e sentro den operashon.’
E palabrashon ku gobièrnu ta ku tur sentro di bario mester tin un kuidadó di interior pa mitar dia, un trahadó atministrativo pa mitar dia, un conciërge pa henter dia, i un kordinadó di aktividat pa henter dia. E Fundashon pa Stimulá Edukashon i Formashon den Bario (Sefba, antes Fundashon Sentro di Bario Kòrsou, Fesebaku) ta haña e presupuesto pa esei i su tarea ta pa e hendenan akí risibí e pago pa nan por hasi e trabou.
Banda di esei kada sentro mester risibí 500 florin pa awa i koriente. Sin embargo e sèn aki no ta yega pa un sentro di bario ku ta funshoná optimalmente. Gobièrnu ta paga e 500 florin direktamente na Aqualectra. E resibunan ku ta mas haltu ku esaki, ta pa kuenta di e sentro di bario mes. Esaki por resulta den un situashon di akumulashon di debe na Aqualectra.
“No ta solamente na Seru di Papaya – tin mas sentro di bario ku ta den mesun situashon. Falta di material pa traha kuné, tambe ta difikultá operashon di e sentronan”, Bitorina ta remarká. Bitorina ta keda karga e speransa, ku un dia lo por ehekutá e plan di Drecha Bario na Ser’i Papaya i ku un dia su soño lo realisá pa su bario kambia di un bario pober pa un bario modelo i hasta bira un atrakshon turístiko.
