Den su 10 aña di eksistensia, e proyekto ‘Duna un man na bo ruman’ a yuda mas ku 7500 mucha ku artíkulo di skol. Esaki ta demostrá ku e instansia ku ta realisá e proyekto, Sentro pa Inovashon i Guia Edukashonal (SIGE), tabatin rason, ora ku el a konstatá e nesesidat akí den komunidat. Mientrastantu muchanan indokumentá tambe a bira un punto di atenshon den e programa.
E proyekto ta enserá dunamentu di oportunidat igual na tur mucha, sin retraso pa motibu di e situashon finansiero di e kas for di kua e ta bini. El a nase for di e kompromiso di empleadonan di SIGE, ku despues di nan trabou ta traha boluntariamente pa hasi un diferensia den bida di e mucha ku ta biba den un situashon sosial difísil, ku sosten di donadónan lokal i internashonal.
’Duna un man na bo ruman’, no ta riba e presupuesto regular di SIGE, ku ta un instansia ku gobièrnu ta supsidia, pero ta realisabel danki na e yudansa di hopi hende.
Selekshon efisiente
Pa hasi e selekshon di e muchanan na un manera mas efisiente i neutral posibel, SIGE ta traha hopi di aserka ku skol- i otro institushonnan ku ta duna yudansa na hende hoben. Pa medio di e partnernan akí, SIGI ta risibí informashon di mucha i hoben di kua ta konosí ku nan tin mester di sosten.
Ademas, SIGE mes tambe ta risibí un kantidat konsiderabel di mucha – mas o ménos 100 – via su propio coach di hobennan, ku den nan trabou di tur dia tin bon bista riba e nesesidatnan den famia.
Ku e donashonnan ku SIGE a risibí aña pasá, el a logra yuda 1.100 mucha i hoben ku un tas di skol yená ku tur e material nesesario pa skol. Ademàs, a yuda un kantidat konsiderabel di esakinan – 65 mucha i hoben – ku unifòrm pa skol. “Di e manera ei, nan por a kuminsá e aña eskolar nobo ku tur e kos nesesario, loke no solamente ta importante, pero tambe ta duna nan mas konfiansa propio, un sentido di seguridat i tambe motivashon,” asina Eveline Blijden, pedagogo i eksperto di guia na skol, ta splika.
Eveline Blijden en Michael Ricardo. Potrètnan Dulce Martiszoon
Oudio Eveline Bijden
Den e proyekto akí ta konsentrá prinsipalmente riba e hobennan di kua nan mayornan ta ménos pudiente. Un desaroyo ku a surgi último añanan, ta alumnonan indokumentá ku tambe ta den nesesesidat. Humphrey Kwidama, coach pa hoben di SIGE, regularmente ta topa e situashonnan aki.
Humphrey Kwidama
Oudio Humphrey Kwidama
Despues di 10 aña, SIGE ta trese un kambio den e forma di yudansa ku e ta pidi pa ‘Duna un man na bo ruman’. Donashon di material no ta resultá di ta e manera mas efektivo pa koperá ku e kousa. Michael Ricardo, pedagogo i eksperto di guia, ta splika ku e intenshon pa donashon di material ta wòrdu apresiá, pero ku donashon di sen ta yuda mihó. ”No ta tur biaha e artíkulonan ku komunidat ta duna – ku hopi bon intenshon – ta di e kalidat rekerí.”
Michael Ricardo
Oudio Michael Ricardo
Optené sufisiente medio finansiero ta sigui ta un reto kontinuo pa SIGE. Ounke ku a logra realisá e proyekto tur aña, ta eksigui hopi esfuerso pa garantisá e finansiamentu nesesario.
Un otro desaroyo ta e echo ku e proyekto ta drai kompletamente riba forsa boluntario di e personal i no ta fásil pa nan kombiná esaki ku nan responsabilidatnan profeshonal di tur dia. Ounke e personal tin dedikashon i planifikashon, tur aña ta demostrá difísil pa kuminsá i ehekutá e proyekto riba tempo i ku e atenshon ku e meresé.
‘’Nos ta rekonosé ku nos mester optimalisá nos planifikashon i organisashon, pa e proyekto por risibí e atenshon i dedikashon ku e meresé,’’ SIGE ta indiká.
Kolekta
Dia 27 di yüni 2025, kolaboradónan di SIGE ta kolektá na varios establesimentu pa rekoudá fondo pa kumpra material di skol. Entre otro lo tin kolekta na Kooyman Zeelandia, Building Depot i na tantu Mangusá Hyper, komo Mangusá Rio Canario.
Por hasi donashon pa medio di un transferensia pa SIGE tambe, na MCB riba númber di kuenta 19569910.
