Ora Darryl Romijn (34) ta praktiká papiamentu ku su yuchi di kasi dos aña, e ta ripará kon lihé e palabranan ta keda kologá. “El a kuminsá bisa palabranan chikitu kaba. Ta hustamente p’esei m’ a traha e buki di ABC. Mi ke pa mi yu ta orguyoso di su roots, i pa na mucha e siña su idioma materno.”
Romijn a lanta na su islanan natal Aruba, Boneiru i Kòrsou (ABC, según e inisialnan na hulandes). Ku su diesnuebe aña el a muda pa Hulanda pa estudio. “E promé añanan tabata un buskamentu sí. Na kuminsamentu bo no sa bon ainda ta kiko bo ke. Ta despues numa m’a haña mi kaminda den empresariado.”
Darryl Romijn ku e buki di ABC. Potrèt Darryl Romijn
Huntu ku su kasá, ku el a siña konosé durante su estudio, el a kuminsá ku un gym na Utrecht, kaminda e ta biba ainda. Esaki a bira un gym eksitoso den e mundu di deporte di hisa peso. “Pasobra kosnan tabata kana asina bon, m’a haña espasio pa otro proyekto.”
Papialingo: siña papiamentu hungando
Papialingo a surgi durante e pandemia di Corona. “Nos tabata na kas, i mi ker a hasi algu positivo. Huntu ku mi ruman i un bon amigu, mi a kuminsá ku un plataforma riba Instagram: Antiano.nl. Promé nos tabata kompartí kontenido riba kuminda i kultura, mas tantu. E ora ei m’a pensa ku lo mi por splika papiamentu na un manera grasioso. Djis vidio simpel ku frasenan di tur dia.”
Pa su sorpresa a e promé vidio a sali haña mas ku mei mion bistaso. “Promé m’a kere ku ta kasualidat, pero e di dos vidio a bai mas duru. Hende a keda pidi pa mas.”
El a deskubrí ku hopi hoben antiano na Hulanda apenas por papia papiamentu, maske nan mayornan sí ta papia e idioma na kas. “E ta bai pèrdí fásilmente, si bo no dediká tempu na dje. Mi ker a trese un kambio den esei.”
Un buki di ABC pa esunnan di mas chikitu
Ora Romijn a bira tata, su deseo pa hasi algu tangibel ku idioma a krese. “Mi ke pa mi yu siña papiamentu for di kuminsamentu. Komo ku no tabatatin buki adekuá pa su edat realmente, mi mes a skirbi unu.”
Ilustradó Stephanie Maduro
Huntu ku e ko-outor i ilustradó Stephanie Maduro, el a desaroyá e buki di ABC pa esunnan di mas chikitu. “Nunka ta muchu trempan pa kuminsá siña papiamentu. Mi tabata ke un buki bunita i sólido, di kalidat haltu, ku figuranan kla i palabranan for di e islanan. Pa mi señora tambe tabata importante pa huntu nos duna nos yu esaki.”
Konekshon entre generashonnan
Romijn ta risibí hopi reakshon di mayornan ku ta kontentu ku nan yunan por siña algu di e idioma i kultura, via su buki i vidionan. “Tin hende ku no tabata sa mes, ku ta riba algu asinaki nan tabata warda. E ta duna nan un manera pa konektá nan mes ku nan yunan i nan roots.”
Aparte di na Hulanda, lo bende e buki pronto na Kòrsou tambe.
Na hulanda por optené e buki via e webshop www.chuchubibooks.nl. Pronto nan lo ta optenibel den librerianan lokal na Kòrsou tambe: “Nos a pone algun buki den un tienda di buki lokal pa wak si tin un nesesidat riba e islanan tambe. Denter di dos dia e promé ehemplarnan a agotá kaba. Awor nos tei manda mas buki pa e isla.”
Plan pa futuro
Romijn ta trahando na bukinan siguiente pa otro edat. “Mi ke pa e muchanan krese ku papiamentu, di bebi te teenager. Asina nan por sigui siña, i sinti nan mes sigur ora nan ta papia nan idioma materno.”
El a desaroyá un wega di memoria i tambe kantika huntu ku e buki, pa famianan por hunga huntu i siña. “Mi ta spera ku ta bira normal pa ta aktivo ku papiamentu semanalmente, na un manera prèt i di wega.”
Su motivashon prinsipal?
“Komo tata esaki ta mi manera pa mustra mi yu di unda mi ta bini. Mi ta kontentu di por hasi esei posibel pa otro mayornan tambe.”
Bo ke sa mas? Tira un bista riba @chuchubibooks.nl via Instagram i TikTok, òf bishitá e wèpsait www.chuchubibooks.nl pa e buki di ABC, i mas. E lèsnan di Papialingo bo ta haña riba @antiano.nl, Instagram i TikTok.
