DELFZIJL – E mamanan antiano, ku aña pasá eksitosamente a habri un kiosko na stashon di Delfzijl, e luna aki apénas a skapa di un seramentu. Danki na ayudo di fundashon Spoor na Werk nan a start di nobo na ougùstùs
Bou di e nòmber Mothers United e seis mamanan soltero a start na yüni di aña pasá i a habri e restorant den e stashon. ‘Un soño a sali’ e kurasoleño Nariela Martis a reakshoná e dia ei ku lágrima di alegria. I esei ta konta pa tur e mamanan: “Pa nos esaki ta un manera pa sali for di bijstand i haña nos independensia bèk.”
Pesadia
Promé e soño di e mamanan a hera di bira un pesadia ora ku mester a renobá e plenchi dilanti di e stashon. “Tabatin santu so i niun hende no por a yega serka. Negoshi tabata bai atras i nan a haña problema finansiero”, Silly Udema di Bewonersbedrijf Delfzijl ta bisa. Huntu ku e kompania aki el a yuda e mamanan habri e kiosko. Pero despues di e kontratempu finansiero esaki no tabata logra mas.
E dia ku e soño a kuminsá ku e seis mamanan antiano
|
E dia ku e soño a kuminsá ku e seis mamanan antiano a habri nan restorashon di stashon Ret Karibense tabatei. “Despues ku finansieramente kos tabata malu tabata hopi trabou pa drecha tur kos atrobe. Nos no por a drumi a nochi. Kon sigui awor?
Finalmente kuminsamentu di e luna aki nan a tende: “E fundashon di empresario Spoor na Werk ta tuma e proyekto Mothers United ofer di Bewonersbedrijf Delfzijl Noord”, e mamanan ta laga sa. Un di e mamanan, Nariela Martis, den e konsepto nobo ta bira e manager.
Konsepto nobo
Yvonne Gaasedam di Spoor na Werk: “Ku ayudo di gemeente awor e ta bira un kompania di traha i siña kaminda tenedónan di státùs tambe ta haña un lugá.” I e konsepto antiano awor? “Esei ta keda. Nos a palabrá ku en todo kaso nos lo keda ofresé un kuminda di dia antiano dos bia pa siman i naturalmente e pastechinan tambe ta keda, esei a bira un konsepto kaba na Delfzijl.”
Apertura definitivo
Dia 26 di ougùstùs e restorant den e stashon ta habri definitivamente i lo ta habri di djaluna pa dja bièrnè di 7.30 te 19.00 or.
