UTRECHT – Sientífikonan di Rijksuniversiteit Groningen i Universidat di Kòrsou ta ferwagt ku na 2020 nan por publiká e resultadonan definitivo di nan investigashon di e eksperensianan di lanta sin tata na Kòrsou òf na Hulanda.
E sientífikonan a kuminsá nan investigashon na 2017 ‘pasobra ta eksistí masha poko investigashon di kultura i komunidat – manera esun di Kòrsou – kaminda lanta sin tata ta okurí hopi’.
Siña di komunidat di Kòrsou
“Nos ta kere ku ta nèt di e komunidatnan aki nos por siña si lanta sin tata ta berdaderamente problemátiko”, Mariëlle Osinga, un di e sientífikonan di Universidat di Groningen ta bisa.
For di investigashon anterior di kultura i komunidat oksidental di e impakto di edukashon sin tata, ta sali ku e ousensia di tata por ta desbentahoso pa e nivel di edukashon i por kondusí na problema emoshonal i di kondukta i kondukta seksual riskante. Si esaki ta asina tambe pa hóben yu di Kòrsou e investigashon nobo aki mester demonstrá.
“Ta posibel masha bon ku hóben na Kòrsou i den komunidat komparabel ta eksperensiá lantamentu sin tata diferente for di hóben den komunidat kaminda famia nuklear ta e norma”, e tim di investigashon ta bisa.
Investigashon anterior
E sikólogo sosial i di desaroyo yu di Kòrsou Odette Girigori tambe ta forma parti di e tim di investigashon. Na 2015 kaba el a hasi investigashon di e konsekuenshanan di lanta sin tata pa e kondukta reproduktivo i e strategianan di partner di mucha muhé na Kòrsou.
Den su disertashon e tempu ei el a konkluí ku ‘mucha muhé ku lanta sin tata en general ta mustra kondukta mas kompetitivo kontra otro mucha muhé i ta usa mas strategia di sedukshon no verbal pa atraé mucha hòmber’.
Kuminsamentu di e luna aki e tim di organisashon a organisá un simposio tokante e resultadonan provishonal di e entrevistanan ku hóben kurasoleño, kurasoleño-hulandes i hulandes ku a lanta sin tata.
Mama, hóben, profeshonal di den kuido, enseñansa i investigashon i otro interesado tabata presente na esaki i a haña okashon pa reakshoná riba e promé konklushonnan
“Den kòmbersashon ku otro a yega na konosementu konhunto”, e investigadónan ta laga sa. “E resultadonan definitivo di entrevista lo sali pronto.
Kon ta hasi investigashon?
Te aworakí e tim di investigashon a entrevistá 51 hóben di Kòrsou i Hulanda. Den esaki e investigadónan a parti hóben yu di Kòrsou na Kòrsou i hóben kurasoleño-hulandes i hóben hulandes di Hulanda. E mamanan di e hóbennan tambe a partisipá na e investigashon.
Durante e entrevistanan a puntra e hóbennan pa deskribí e laso ku nan tata i su manera di edukashon. Tambe e investigashon a puntra e hóbennan nan eksperensia di lanta sin tata i kiko nan lo rekomendá otro hóben ku ta lanta sin tata.
Banda di e entrevistanan e investigadónan tabata laga yena lista di pregunta online na skolnan na Kòrsou i na Hulanda. Den e lista di pregunta aki ta hasi pregunta tokante desaroyo di pubertat i seksual, problema di kondukta, eksperensia di skol i uso di alkohòl i droga.
