ORANJESTAD – Hobennan ta indica durante e anochi di informacion di DUO cu ainda nan ta prefera e prestamo Hulandes mas caro ariba e Arubalening mas barata. Y asina haya nan mes obliga pa keda mas largo na Hulanda pa traha pa paga nan debe.
Empleadonan di DUO ta na Aruba e simannan aki pa duna informacion, locual nan tambe a haci na Corsou prome. No ta mucho cla si na Aruba tambe tin kehonan di ex studiantenan manera na Corsou unda ta haya cu DUO no ta tene suficiente cuenta cu e circustancianan local pa paga bek nan debe. Nan ta haya cu riba e islanan e gastonan di bida ta mas halto mientrastanto e sueldonan ta mas abou compara cu na Hulanda.
Na Corsou ex studiantenan a organisa nan mes pa protesta y tambe na Sint-Maarten tin kehonan. Sinembargo na Aruba no por tende mucho protesta pa adapta e areglo di carga di DUO manera na e otro islanan.
Locual si por ripara riba e anochi di informacion cu hobennan cu lo bay studia pronto, mayoria ainda ta scoge p’e prestamo caro di DUO riba Arubalening cual ta mas barata pa paga bek.
Kico Arubalening ta encera?
Pasobra Arubalening no ta parce suficiente pa studianten cu kier bay Hulanda. E prestamo mas tanto ta un alivio pa e prome gastonan di vivienda y otro asuntonan basico. Den e prome aña e studiante cu ta bay Hulanda, lo ricibi e pakete di 15 mil florin (algo mas cu 7600 euro) y despues 3181 florin (1614 euro) den un termino. E siguiente añanan e studiante lo ricibi e sumi aki den dos termino. Pues algo mas cu 6000 mil (un poco mas cu 3000 euro) total pa aña.
Esun cu ta regresa dentro di tres aña y lo cumpli cu cinco aña di trabou na Aruba, por haya un descuento di 35% riba nan debe. Y entrante di 2020 no mester paga interes mas.
Pero pa Shadira Milani (19) kende ta den Havo, Arubalening ainda no ta atractivo. “E no ta suficiente. Esey nan ta bisa tambe na mi scol y mi mama tambe.” Destiny Maduro (23) ta atende Universidad di Aruba pa un estudio di bachelor y ya tin Arubalening. “E bahamento na zero porciento di interes sigur lo yuda. Pero mi kier sigui cu un estudio di master na Hulanda. Y mi no ta kere cu mi por sin presta na DUO.”
Nan pero hopi otro studiantenan na e encuentro ta indica cu nan lo no bin Aruba bek por lo pronto, despues di slaag. Maduro tampoco. “Mi por gana mas placa eybanda pa paga mi debenan mas lihe. Tambe esun di Arubalening.”
DUO no ta tene cuenta cu valuta
Un di e mayornan presente, esta Mark, ta puntra un empleado di DUO si no ta posibel pa tene cuenta cu e cambio di valuta. “Esaki ta un riesgo. Pasobra ora e euro lo bira dobel mas caro, un debe halto ya lo bira dobel mas halto pa e studiante.” E ta propone pa busca un solucion, por ehempel check cu baconan si nan por ofrece un pakete di fiansa cu un valuta mas fiho. Sinembargo for di e contesta cu Mark ta haya di DUO ta cla cu nan no tin oido pa e proposicion aki.
