DEN HAAG – Akohida di mucha na munisipionan karibense ta bira grátis òf nò? Gobièrnu di Boneiru ta prekupá ku gabinete hulandes ke laga mayornan ku tiki entrada tambe paga.
Sekretario Van Ark (Asuntunan Sosial i Empleo) ke pa akohida di mucha te ku kuater aña di edat bira ‘un previshon básiko’ den e tres munisipionan karibense. Kiko esaki ta enserá? Esei Ministerio no ke elaborá ariba ainda
Segun e gobièrnu di Boneiru ta parse manera ‘e diferente kategorianan, esta tambe mayornan ku tiki entrada’ awor tambe mester paga, diputado Nina Den Heyer (Asuntunan Sosial) ta bisa. Maske ta sinku dòler pa luna, tòg esei tambe ta un mal plan.”
“Un mayor ku kada dia ta hañ’e ku eskoho finansiero difísil, naturalmente lo kumpra kuminda pa e yu i no saka e sèn aki na akohida di mucha. Paga tinu: ata e muchanan a keda na kas tur e tempu ei ku e ruman mas grandi.”
Boneiru: ‘Grátis pa tur mayor’
Den Heyer ke pa e akohida di mucha den e munisipionan karibense ‘di tur manera bira grátis pa tur mayor.’ “Esei ta loke e islanan ta komprondé bou di previshon básiko. Meskos ku akseso na enseñansa, loke tambe nos ta yama previshon básiko.”
Tambe D66, Groen Links i PvdA mas largu kaba ta boga pa ‘grátis’. Segun Den Heyer anualmente esaki lo kosta Boneiru, Saba i Sint Eustatius huntu un 25 mion euro pa aña.
Ma esakinan no ta suma ku mester pone Hulanda pèrdè soño. E diskushon di awor sí ta si ta e munisipionan karibense mester paga esaki nan mes ku e bùdjèt miskiña ku nos ta haña.”
E motibu ku akohida di mucha mester bira un ‘previshon básiko’, segun gabinete na promé instansha ta pa aliviá e mayornan. Pero tambe pa e mayornan por sali for di nan debenan sin ayudo di gobièrnu.
Kuantu mayornan mester paga eksaktamente?
Na tur dos banda di oséano a traha i presentá kalkulashon durante e deliberashonnan ku Hulanda i e tres islanan, Den Heyer ta bisa. “Pero e sifranan ei nos no por publiká ainda.” Esei ta ministerio ta determiná.
Karta pa Tweede Kamer
‘Ministerio di Asuntunan Sosial i Empleo ainda no a reakshoná riba pregunta di Ret Karibense. Sekretario di Estado Van Ark anteriormente a primintí ku pa mas lat fin di e luna aki e lo manda un karta pa Tweede Kamer ku e státùs di e situashon.
Segun fuentenan serka di e sekretario di estado lo sintonisá e kontenido di e karta ku e islanan i probablemente lo mand’é Kamer e siman aki kaba.
