WILLEMSTAD – “Kere mi! Nos lo bira esun di mas grandi. Nos ta bai pa diesun asiento. Niun hende no por para nos!”
E futuro promé minister di Kòrsou, Gilmar Pisas, tabata masha entusiasmá i kasi tabata grita ora ku el a papia ku media djabièrnè pasá promé ku el a bai vota na ‘su’ Bandabou.
Lider di MFK Pisas ta kuminda su partidarionan for di su outo. Potrèt: Facebook
Pisas lo a bai vota kuat’or di atardi, el a yega sink’or. E karavana di partidario di e partido MFK a tuma hopi tempu pa yega. Pero únabes ku nan a yega Kolegio San José na Barber Pisas kasi a rementá di entusiasmo. Algun ora despues el a mira ku el a haña rason den e resultado di elekshon.
31 aña despues di Maria Liberia-Peters – e promé minister di Antia Hulandes anterior di PNP – Pisas tambe a kue nuebe asiento di e total di 21 den parlamento di Kòrsou.
Avalancha grandi
E elekshonnan pa parlamento di djabièrnè 19 di mart a trese un kambio grandi den polítika di Kòrsou. No solamente e koalishon di PAR i MAN a mira e kantidat di asiento baha formal (PAR di seis pa kuater, MAN di sinku pa dos). E partidonan Kòrsou di Nos Tur (di Amparo Dos Santos), Movementu Progresivo (di Marilyn Moses) i Pueblo Soberano (lantá pa Helmin Wiels ku a tira mata na 2013) lo no bolbe mas.
I di e partidonan nobo ku ambishon manera Vishon, Un Kambio pa Kòrsou i Kumun niun partido no a haña sufisiente voto pa un asiento. Ku esaki Pisas ta e ganadó indiskutibel di elekshon.
Ken ta Gilmar Pisas?
Pisas gusta gana. E ta dirigí riba logro. “Henter mi bida hende a supestimá mi. Pero lárgubai mi ta alkansá mi metanan, lárgubai mi ta presta bon. Aworakí atrobe. MFK ta e partido di mas grandi.” Pisas di 49 aña di edat ta di orígen humilde, el a lanta na Soto, un di e barionan di mas pober na Bándabou i el a bira polis.
Añanan pasá èks minister Ersilia de Lannooy di PNP a rekonosé e potensial den e polis haltu delegá. E tabata riba lista di PNP. Hende di Bándabou a vota p’e, pero segun e, nunka e partido no a kumpli ku niun promesa pa desaroyo di Bándabou. Despues a bini MAN, mésun historia. Riba lista el a atraé voto, pero segun Pisas atrobe no a kumpli ku niun promesa.
Gerrit Schotte
Gerrit Schotte sí a mira algu den Pisas na 2010 ora el a lanta su partido MFK i a ofres’é un lugá riba lista. Finalmente Pisas, ku tabata diligente i tabata traha duru, a bira e di dos hòmber di e partido. Despues ku Schotte a bai será na fin di 2018, kasi outomátikamente Pisas a bira lider di e partido.
Hopi interes – serka riba otro – ora Pisas vota. Potrèt: Facebook
Tin hende tabata mir’é komo un lider di transishon. Pero Pisas a perseverá, el a hiba un oposishon firme i un bon kampaña i ku esaki el a logra e mihó resultado di un partido na Kòrsou for di 1990. Awor e por bira promé minister; e tabata esaki kaba pa un temporada kòrtiku despues ku gabinete Koeiman a kai na 2017. Pero esei tabata solamente algun siman. Awor e posishon inisial ta mustra hopi mas faborabel p’e.
E koalishon a pèrdè hopi i ta manera PNP (kuater asiento) ke kolaborá ku MFK. Huntu e dos partidonan tin 13 asiento sólido di e 21 asientonan den parlamento.
Negoshá di nobo tokante e COHO kontroversial
Un punto importante riba agènda: E Órgano Karibense Pa Reformashon i Desaroyo (COHO: Caribisch Orgaan voor Hervormingen en Ontwikkelingen) pa kua gobièrnu-Rhuggenaath – pa haña sosten finansiero – a hasi palabrashonnan ku Hulanda pa un reformashon riguroso di Kòrsou pa e seis añanan binidero.
‘Muchu tempu nos a tende ku nos mes no por’
-Gilmar Pisas
Pisas no ke tuma COHO ofer, sino e ke negoshá di nobo ku Hulanda. Ei tambe e ke mustra ku e por logra algu pa Kòrsou. “E pueblo a tende asina largu ku e mes no por. Ku e tin mester di yudansa. Mi ke mustra e pueblo ku nos potensial ta enorme. I mi ke ta e lider ku ta desaroyá e potensial di e pueblo mas aleu.”
