Kuantu plaka Kòrsou karnaval ta generá? I unda tur tin oportunidat pa krea mas plaka? Alvin Daal, èks miembro di direktiva di Fundashon Karnaval Kòrsou, tin hopi gana pa bin ku un investigashon.
Paso sin hasi investigashon mes e por pensa diferente manera ku Kòrsou lo por gana hopi mas plaka, e ta splika. Por ehèmpel den e lunanan promé ku karnaval: gruponan ku ta partisipá ta kumpra hopi di nan material den eksterior. Esei ta nifiká ku basta plaka ta sali bai laga Kòrsou; asina nos isla ta benefisiá kompanianan di otro pais.
Alvin Daal tokante oportunidat ekonomiko ku karnaval
Por pensa diferente manera pa Kòrsou mes produsí sierto materialnan pa trahe. Por ehèmpel, si gruponan kumpra mashin pa traha adorno. “Kisas e tela bo no por produsí aki, pero e formashon di tur e kosnan bunita ku nos ta mira riba e trahe, por prent lokalmente huzando plèstik.”
“Henter aña por kolekta plèstik”, e ta splika. Esei ta tene e kosto abou. “Tin hopi mas benefisio. Paso nos ta resiklá, kuida nos ambiente i nos tin un posibilidat ilimitá pa krea disfras.”
Ademas, si produsí adorno na Kòrsou lo por laga plaka di eksterior drenta nos ekonomia. Por bende por ehèmpel e stenchinan di plèstik ku otro paisnan den region; paso den Karibe mes tin diferente islanan ku tur aña ta tene nan propio karnaval.
Tin un otro kos remarkabel, e ta haña. E ta mira ku diferente pais den nos region a siña fo’i e efektonan negativo di covid. “Otro paisnan grandi ku tambe no ta tin karnaval na 2020 i 2021, sí a midi kon duru e sla tabata pa nan ekonomia. Nos no a hasi esei.”
