Curaçao Medical Center (CMC) ta buska un direktor general nobo. E ceo aktual Gilbert Martina ta stòp yüni otro aña. Su susesor mester tin hopi abilidat. Pasobra kos ta problemátiko na e hòspital. Tin krísis na tur nivel.
E hòspital apénas por paga e fakturanan di suministradó i otro kreditor. E falta di likides fin di mei 2024 a subi bira mas haltu ku 200 mion florin. Banda di esaki tin un skarsedat struktural di personal. Pa motibu di esaki e kuido planeá kontinuamente ta bou di preshon.
Ken ta bai hinka su kurpa den e nèshi di araña di problema aki. “Un persona ku por konektá i ku tin abilidat komunikativo ekstremamente bon”, Jacques Heide ta bisa. Heide di 2011 te ku mei di 2019 tabata embolbí estrechamente den e transishon di e hòspital bieu Sehos pa CMC.
“E ceo nobo ta sinta na mesa ku trahadó di hòspital, sindikato, minister i ámtenar di e ministerio. Ta un tereno polítiko kompliká”, Heide ta bisa.
FOTO Jacques Heide
Heide ta pensa riba un persona di edat di sinkuenta òf sesenta plùs aña: un hende ku un base médiko i hopi eksperensia, tambe den e área multikultural. “I ku ta bini di eksterior”, Heide ta bisa. “Promé mester bira blachi kuminsá di nobo. Kaba bo por skohe atrobe pa un kandidato lokal.”
‘Un stratego ku rumbo fiho i kurashi’
Siruhano Michel Berry ta haña ku mester buska e susesor di Martina na Kòrsou mes. “Un hende ku ta un bon manager na un hòspital hulandes, no ta di mes e ta esaki tambe na CMC.”
Berry ta pensa riba un spesialista médiko ku eksperensia den maneho i ‘un konosementu sólido di e kultura i polítika lokal’. “Un stratego ku un rumbo fiho. E ta enérgiko, e ta inspirá i e tin kurashi. Un hende ku ta solushoná konflikto, ku ta enbolbí i aksesibel.”
FOTO Michel Berry
Pasobra si ta na siruhano Berry, e direktor nobo lo tin un papel aktivo den e kambionan di e sistema di kuido na e isla. Esaki ta trata tambe di aseguradónan di kuido, manera Sociale Verzekeringsbank (SVB).
Berry: “Esaki ta pidi un hende ku gusta un reto fuerte.” Pues un kandidato adekuá tin e konosementu i e kalidatnan nesesario, pero ta distinguí su mes ku su komportashon i e manera ku e ta trata ku hende.
Anthon Casperson, direktor general anterior di Sint Elisabeth Hospitaal (Sehos), tambe ta enfatisá e importansia di ‘soft-skills’.
Downsize
Casperson ta haña ku CMC mester ‘downsize’ di 300 pa 200 òf 250 kama. “Ménos kama, ménos espasio di funshon. E ora ei en bes di kuater bo por usa tres ala i hür esun i baha gastu.”
No por otro, Casperson ta konkluí. “Ekonomia di Kòrsou ta stanka. E produkto bruto di interior i e poblashon apénas ta krese. Esaki ta nifiká ménos entrada di impuesto i prima ku a premirá.
FOTO Anthon Casperson
Pesei un futuro direktor di hòspital lo hañ’é ta tuma medida duru i impopular. Casperson: “E ora ei bo mester di un hende ku ta èkstra fuerte si ta trata di HR i di maneho di komunikashon. Un hende ku ta inspirá i ku por ekspandé un vishon kla. Un hende ku ta skohe solushonnan ku por ehekutá tambe na un isla chikí manera Kòrsou.”
Jacques Heide ta haña ku tresshen kama na hòspital no ta di mas. “Ta shen kama ménos kaba ku na Sehos. CMC ta ekipá ku e aparatonan tékniko di mas moderno. E por ta berdaderamente un hòspital fantástiko. Pero e ora ei gobièrnu mester kumpli ku su palabrashonnan i pèrkurá pa un bùdjèt mas
amplio pa e hòspital, un rebaho di e gastunan di laboratorio i mió preis di kompra pa remedi.”
Maksimalmente dos término
Den un notisia riba e website di CMC Gilbert Martina ta enfatisá ku su desishon ta ‘pará lòs di polítika’. Martina ta bisa ku e ta sigui e statütnan di e organisashon ku ta determiná ku un ceo por keda maksimalmente dos término di kuater aña. Pero kon ku bai bini e ta haña e sirkulashon di ehekutivo ta un bon prinsipio, sigur si ta trata di ‘funshonnan públiko ku tin un impakto grandi riba komunidat, manera un hòspital’.
Na òktober 2017 Martina a kuminsá komo direktor di Hòspital Nobo Otrobanda (HNO) ku na novèmber 2019 a habri komo Curaçao Medical Center (CMC). Meskos ku Heide e ta kere ku bou di maneho di su susesor ‘CMC por bira e mihó hòspital den Área Karibense’ i ‘potensialmente un di e mihó hòspitalnan di mundu’.
