ORANJESTAD – E famianan di e arubano ku a muri na 2015, Mitch Henriquez, a bini Hulanda ‘pòrnada’, awor ku a posponé e kaso penal kontra e dos polisnan sospechoso di su morto. Asina e abogado di e famia, Richard Korver, ta bisa.
Ayera korte a posponé e kaso den korte kontra e dos polisnan. Motibu pa esaki ta un rapòrt forénsiko ku e abogado di e dos polisnan a laga traha. Eiden tin pará ku Henriquez a muri di atake di kurason i no komo konsekuensha di e asina yamá ‘nekklem’ ku e polisnan a usa riba dje pa chok’é.
Posponé
“Korte ke warda e reakshon di e otro ekspertonan i p’esei a posponé”, segun Korver. Segun e abogado e rapòrt aki ta te na último momentu promé ku e trato planeá a entreg’é na korte. “Korte a bisa aserka ku nan ta haña e asuntu masha fèrfelu pa e famianan i asta ta kalifiká esaki komo lamentabel.”
Kòrver ta mustra ku durante di e seshon preliminar ku a tuma lugá na febrüari por a trata e asuntu aki. “E abogadonan di e polisnan no a bisa nada e dia ei, miéntras ku nan tabata sa ku tin un rapòrt ta bini.”
Mitch Henriquez a fayesé na yüni di 2015 durante un festival na Den Haag, despues ku a arest’é ku forsa brutu. Te awe ta e ckokamentu ku ‘nekklem’ tabata e kousa di morto asumí. Potrèt: Facebook
Prepará pòrnada
Korver ta bisa ku e famianan di Mitch a bula pa Hulanda kaba pa trato di e kaso penal. “Su ruman muhé mester a pidi liber espesialmente serka su dunadó di trabou. Si e ora ei na laster momentu bo tende ku e kos no ta sigui, bo a tuma liber pòrnada, kumpra teket i prepará pòrnada. Korver ta bisa ku e ta bai trata pa sikiera haña rekompensashon pa e gastunan di biahe pa e famia.
Entretantu tin dos otro prosedura ta kore den e kaso di Mitch Henriquez. Pa kuminsá Korver ainda ta warda un pronunsiashon di korte. El a pidi korte pa pèrsiguí e otro tres polisnan envolví tambe. Ademas Korver ta spera di pèrsiguí e dos polisnan ku ta pèrsiguí awor pa hibamentu i lagamentu atras di Mitch den un situashon kaminda e no por a yuda su kurpa.
“Pa esaki por haña nuebe aña di kastigu di sèl. Ke men ta hasi un diferensha grandi. Aktualmente OM a bai pa kulpa di morto i pa esaki por haña dos aña di sèl. Ke men ta basta un diferensha.” Korver a tende di korte ku nan ke un sentensia djárason awor.
Posibel fecha
Djabièrnè awor Korver ta spera e sentensia di e kaso sumario ku e famianan a hiba pa haña e nòmbernan di e polisnan envolví. “Asina nos mes por hasi investigashon di e pasado di e polisnan ei, pasobra hustisia hulandes no a hasi e investigashon ei.” E siguiente seshon kaminda lo skohe un posibel fecha pa e trato di kontenido di e kaso penal kontra e dos polisnan ta planeá pa 6 di aprel.
