HILVERSUM – “E famianan a pèrdè Mitch kaba, ke men nan no tin nada mas di pèrdè. Nos ta sigui hiba e kaso te ora bèrdat sali”, abogado Richard Korver ta bisa. Korte a disidí djabièrnè pa no kompartí e identidat di e sinku polisnan sospechoso ku e famianan i nan abogadonan.
Ta e di tres desapunte tras di otro pa e famianan den e proseso kontra e polisnan ku tabata envolví den e detenshon fatal di Henriquez na 2015.
Segun Korvers awor ta imposibel pa vigilá si e polisnan sospechoso di bèrdat lo sinta nan kastigu eventual. “Bo no por kontrolá si DH01 ta bai será di bèrdè. Niun hende no sa ken DH01 ta.”
Korte oropeo
Awor e parientenan ke bai Korte oropeo pa Derecho Humano. Segun nan abogado nan kaso ta fuerte. E ‘investigashon suak’ di e morto di Henriquez segun Korver ta un motibu riba su mes.
E parientenan ta spera riba un proseso honesto. “Korte oropeo a yega di skual Hulanda kaba pa proseduranan hudisial”, segun Korver. Kisas esaki ta bira di tres bia.”
Apelashon
Den un deklarashon por eskrito korte di Den Haag ta laga sa ku wes a rechasá e eksigensia di e parientenan anteriormente kaba. P’esei korte no por bringa e desishon di wes.
“Asina ta manda e famianan di un punto pa otro”, Korver ta reakshoná. E famia no ta tuma i ke apelá. “Nos ta bai studia e posibilidat aki i si hurídikamente ta posibel nos ta apelá sigur.”
