SCHIPHOL – E famianan di Mitch Henriquez segun abogado Gerald Roethof ta haña ‘teribel’ ku atrobe ta posponé e kaso. Motibu ta ku korte a ordená ku mester investigá mas aleu e kousa di morto di Henriquez. Esaki a divulgá awe durante di e di dos seshon pro forma den korte na Schiphol.
Segun Alex Dijkhoff, primu di Henriquez, ta masha importante pa e famia pa sera e kaso mas lihé posibel. “Pa asina nos por kuminsá prosesá loke a pasa. Ta dura muchu.”
Primu Alex Dijkhoff ta papia ku Pieter Hofmann
Identidat di e sospechosonan
Richard Korver, abogado di e parientenan, atrobe a pleita e dunamentu di e identidat di e polisnan sospechoso. El a pidi esaki un bia kaba den korte i despues el a entamá un kaso sumario. Korver ta haña ku ta daña e prinsipio hudisial di hustisia habrí. “No tin niun sorto di manera pa kontrolá algu.”
Ministerio Públiko (OM) ta haña ku ta un ripitishon di e pasonan i ta enfatisá ku OM ta responsabel pa e eventual ehekushon di kastigu.
Defensa ta mustra riba menasanan di e polisnan sospechoso. Sospechoso DH02, manera ta yama e di dos sospechoso, ta teme pa seguridat di su famia si su nòmber bira konosí. Dijkhoff tokante e menasanan: “Si nos mester tuma tur menasa riba social media na serio e ora ei tres kuart di Hulanda por bai buska seguridat pa nan mes.”
Korte ta disidí riba 20 di aprel tokante e divulgashon di e identidatnan di e sospechosonan. Esei tambe ta posibel bou di kondishonnan estrikto, por ehèmpel ku ta e abogadonan di e parientenan so por sa ta di ken ta trata. Wes den su mes palabranan ta bisa ku el a mira e strafblatnan bashi di e sospechosonan kaba.
Parlamentario Desirée de Sousa-Croes ta papia ku Pieter Hofmann
Opservadó parlamentario
E parlamentario arubano Desirée de Sousa-Croes a patisipá na e seshon komo opservadó na nòmber di Staten di Aruba. “Serka nos nunka no a sosodé ku no ta duna e nòmbernan di e sospechosonan. Pasobra den kuminsamentu a kometé algun eror i no ke duna e nòmbernan tin duda (tokante un proseso hudisial korekto). Mi ta spera ku lo kita e dudanan aki.” E miembro di Staten ta bisa ku el a keda ku un bon sintimentu di su bishita djawe.
