WILLEMSTAD – E destrukshon di e koral durante konstrukshon di Megapir a alkansá notisianan internashonal e último simannan. For di e promé resultadonan di e investigashon di e aksidente, a sali ku en berdat un anker a destruí e koral. Mark Vermeij, investigadó na Carmabi ta bisa ku ta un bergwensa. Pero e no ta sorpresá ku e kos a bai malu. E pregunta ta surgi si konstrukshon i mantenshon di koral na Kòrsou por bai huntu.
Na e mesun momentu ku ta traha na Megapier, na Mari Pampun ta konstruí un bulevar di rekreashon. A adaptá e plannan pa esaki resientemente, pasobra e koral lo a sufri daño.
“Den konstrukshon di e bulevar di rekreashon na Mari Pampun nan ta trata reglanan ku mas seriedat.”
Farley Virginia di e kompania di propiedat inmóbil Heren 2, e persona ku a diseñá e bulevar, ta konta: “Na promé instansha nos tabatin e idea di traha un playa di bèrdè aki, unu kaminda bo por kana drenta laman for di e santu. Pa realisá esaki mester a basha santu den un parti di loke aktualmente ta awa. Esaki lo a daña e koral.”
I esei no ta pèrmití, segun reglanan nashonal i internashonal Ke men Virginia ku su tim mester a hasi un proposishon nobo kaminda lo no a daña e koral. “Nos a pensa un plan kaminda lo bini un pir for di kua hende por drenta laman”, segun Virginia. “Banda di esaki nos ke konstruí un pisina chiki di awa di laman riba e playa. Di e manera aki bishitantenan por landa dushi di nan i nos no ta kibra e koral.
Violashon di palabrashon nashonal i internashonal
Ke men ta posibel si: spar koral i konstruí. Pero kon por ta ku na Mari Pampun si por i na Megapir nò? Segun Mark Vermeij e kontesta riba esaki ta simpel: “Den konstrukshon di e bulevar di rekreashon na Mari Pampun nan ta trata reglanan ku mas seriedat. Na e konstrukshon di Megapir en kambio nan no ta tuma e reglanan masha na serio”
E ta splika: Den e pèrmitnan di konstrukshon di Megapir tin pará por ehèmpel ku mester laba e piedanan pa e breakwater promé ku pone nan. Pero tambe ku no por tira un anker unda ku ta den awa. Niun di dos promesa no a kumpli kuné. Ta un anker grandi asina awor a destruí e un parti grandi di e koral.”
Tambe riba nivel internashonal ta keda sin aster palabrashonnan. Pasobra Megapir por ta di importansha pa desaroyo ekonómiko i e sektor turístiko na e isla, na nivel internashonal a disidí ku lo aseptá daño limitá na e koral. Kontal ku, pa kompensashon, lo invertí den protekshon di koral na Oostpunt. “Pero esaki tampoko no ta logra”, Meijer ta bisa. “I mi no tin e idea ku esaki ta na punto di kambia.”
