WILLEMSTAD – Awe mainta, alrededor di 05:47 mainta, tabatin un kandela grandi riba tereno di Refineria ISLA. Fuentenan a indiká ku pòmp P1204, situá den un di e kolumnanan di destilashon di CD-3 – Crude Distiller 3 – a eksperensia un eskapé, kual a okurí despues ku e operadornan a kompletá nan rondu i a keda diskubrí rònt di 6:15 di mainta. Bosero suplente Earl Balborda a indiká ku e kandela keda kompletamente pagá pa 09:20 di mainta.
Balborda a splika ku CD-3 ta un di e promé plantanan den e kadena di refinashon di Refineria Isla ku ta produsí entre otro gasolin. Na luna di aprel e planta di CD-3 a kaba di sali for di un mantenshon planifiká grandi. Binti aña pasa e mes un planta a pega na kandela, pero a funshoná normalmente despues ku esaki a keda drecha.
Deya Mensche ta papoa ku Earl Balborda
Balborda a splika ku Refineria ISLA a instalá un tim di investigashon ku lo bai investiga kiko a kousa e insidente i tambe determiná e gravedat di e daño ku e instalashon a sufri. Tambe gerensia a reuní ku e tim di kalamidat di gobièrnu, i alabes a informa diferente instansia gubernamental riba e insidente.
Impakto ambiental
Balborda a enfatisá ku e kandela i e emishon èkstra di gasolin no a kousa niun daño pa e habitantenan di e barionan bisiña. Ret Karibense a tuma kontakto ku representantenan di e tim di kalamidat, ku ta wardando e investigashon keda kompletá, promé ku nan hasí un deklarashon riba e embergadura di e impakto na salubridat i medio ambiente. Finalmente, Balborda a deklará ku no tabatin ningun persona leshoná i ku e kandela no lo afektá suministro di gas, gasolin, kerozin i diésel pa merkado lokal.
