WILLEMSTAD – Konseho di Supervishon di Sint Elisabeth Hospitaal (Sehos) na Kòrsou a haña un instrukshon di Inspekshon di Salubridat. “Nos tin kasi dos aña ta trata di laga Sehos pone e asuntunan na òrdu, ke men e instrukshon ta nesesario”, e inspektor di salubridat Gershi Rodrigues Pereira ta bisa.
E inspekshon ta haña ku ta falta ‘e komprenshon eksihí i e ekspertisa nesesario’ den kumbre di Sehos. Ku e instrukshon na e Konseho di Supervishon inspekshon a duna òrdu pa nombra un manager di hòspital ku eksperensia , pa drecha e ‘kuido di pashènt’.
Segun e direktor di Sehos, Frank Scheper, e hòspital ta meimei den un fase di transishon di e hòspital bieu pa e hòspital nobo. Ta konstruí e hòspital nobo banda di e edifisio bieu. “E situashon ta úniko i bon mirá no sa sosodé niun kaminda: un edifisio nobo, ta outomatisá tur kos i esaki ta eksihí masha hopi proseso. Nos mester bini kla ku loke ku nos tin.”
Atraso
Loke tin ta limitá segun direktiva. Finansieramente e situashon ta prekario basta tempu. Ta difisil pa buska mas fondo, pasobra no por mustra bon kon pèrtá e situashon finansiero ta: a kaba di publiká e relato anual di 2015. “Esaki ta un herensia di e direktiva anterior. Nos ta traha duru pa alkansá e retraso, pero te e dia ei nos no por produsí sifra i esei ta hasi e situashon mas difísil”, Scheper ta bisa.
Pone prioridat
Scheper ta enfatisá ku e preshon ta haltu den e hòspital. “Den mayoria pais ta parti e kapasidat. Ora ta hopi okupá ta referí pashènt na un otro hòspital. Serka nos esaki no por. Tin bia nos mester pone prioridat por ehèmpel si a sosodé un aksidente di outo grave.”
Tòg ta posibel pa alkansá un situashon sano si, segun Scheper. “Nos mester deliberá ku e instanshanan envolví i mester kambia kos i adaptá modelonan. Nos ta deliberá hopi riba esaki.”
