WILLEMSTAD – “No tin otro kaminda pa nos bai, nos a keda manera vagabundonan”. Esaki ta palabranan di Frank Abbott na momentu ku mester a bandoná e ‘man camp’ di Refineria Isla. Abbott ta un di e tantísimo personanan di Sint-Maarten ku tabata keda den e kompleho aki riba kuenta di Ministerio di Desaroyo Sosial, Labor i Bienestar (SOAW).
Abbott ta yu di Kòrsou pero tin 48 aña ta biba na Sint-Maarten. Orkan Irma a destruí su kas por kompletu i por lo pronto e no ke bai bèk. Abbott ta sinti su mes desampará. “si mi keda na Kòrsou ta den kas di ansiano mi mester bai”, e ta lamentá.
Man Camp Refineria Isla – José Manuel Dias
A sera ‘man camp’
E palabrashon tabata ku e hendenan di Sint-Maarten por a keda te 15 di òktober ku posibilidat di prolongashon te ku fin di òktober. Sinembargo e periodo di yudansa urgente pa Sint-Maarten a yega na su fin i SOAW a disidí di sera e ‘man camp’ promé ku e fecha kumbiní. E habitantenan di e ‘man camp’ por a skohe entre regresá Sint-Maarten pagando nan mes pasashi òf bai keda serka famia na Kòrsou.
Sèn pa pasashi
Rosemary Williams tin dos yu na Hulanda i ta preferá di bai keda serka nan i no bai bèk Sint-Maarten. “Mi tabatin e speransa ku gobièrnu lo por a sòru sikiera pa e pasashinan”, Williams a remarká. E tiki famia ku e tin na Sint-Maarten no por yud’é finansieramente pasobra nan tambe a pèrdè nan kas.
Kordinadó di e Tim di Kalamidat di Kòrsou, Lesley Fer, ta enfatisá ku niun ora so gobièrnu di Kòrsou a komprometé su mes pa paga pasashi di regreso. “E úniko kos ku Kòrsou a ofresé komo yudansa ta estadia i kuido temporal den e ‘man camp’ di Refineria Isla”, Fer a aklará.
Responsabilidat di Reino
Roy Benders ta haña ku den e kaso aki no mester hasi distinshon ta riba kua teritorio di Reino bo ta. “Den mi pasport tin pará ‘Koningrijk der Nederlanden’ i komo tal Reino mester keda responsabel pa su siudadanonan”, Benders ta enfatisá.
Na momentu ku SOAW a entregá e ‘man camp’ tabatin alrededor di 26 persona ta keda den e kompleho. Segun minister Hensley Koeiman di SOAW, di e kantidat aki ta apénas dos a opta pa bai bèk Sint-Maarten. “Mas ku mitar a bai otro destinashon manera por ehèmpel Hulanda miéntras ku sobrá a keda Kòrsou”, Koeiman a konfirmá.
Durante e periodo di un luna ku Refineria Isla a pone e ‘ man camp’ disponibel, alrededor di 214 siudadano di Sint-Maarten a haña refugio temporal na Kòrsou. Algun a keda un par di dia so miéntras ku otronan a opta pa keda mas tempu. Entre estadia i kuminda kada persona ta kosta alrededor di 150 florin pa dia.
