DEN HAAG – Pa di promé biaha for di 2010, despues di e desmantelashon di Antia Hulandes, no ta un minister lo atendé Relashonnan di Reino sino un sekretario di estado. Djamars anochi Raymond Knops (46) lo hiba un konbersashon ofishal ku formadó Mark Rutte.
Esun ku tin na mira pa bira minister di Asuntunan Interior i di Realshonnan di Reino (BZK) ta e alkalde suplente Kasja Ollongren (D66), pero e diferente dossier-nan difísil tokante e islanan lo warda riba Knops.
Retonan grandi
E rekonstrukshon di Sint Maarten, e fondo pa yudansa i e krisis na e pais bisiña Venezuela, a sòru kaba pa diskushon bou di e mando di Ronald Plasterk. E munisipio karibeño Sint Eustatius tambe ta un fuente di prekupashon pa Den Haag. E isla ke imponé outonomia: un eksigensha ku ta kana samsam ku pleitunan formal ku e ministerio di BZK.
Tin bukinan yen di apresiashon- i konsehonan di e komishon-Spies tambe ta warda e polítiko di CDA. Nan ta trata di e desigualdat entre e parti karibeño i e parti hulandes di Hulanda.
Ken ta Raymond Knops?
Knops ta eks-militar i un profeshonal riba área di gobernashon. Komo miembro di Tweede Kamer pa Defensie i maneho pa eksterior, e ta konosí ku e islanan. E tin mas ku dies aña di eksperiensha den Parlamentu i promé ku esei e tabata konsehal ku kartera. Banda di esakinan e tin un lista largu di funshonnan gubernamental i di presidensia.
E miembro di Tweede Kamer Raymond Knops (CDA) – Potrèt: Tweede Kamer
‘No nonsense i stret’, asina e eks-presidente di Tweede Kamer Gerdi Verbeet (PvdA) a tipifiká Knops durante su despedida di Tweede Kamer na 2010. E tin “ponensianan fuerte, hopi biaha kankan di humor seku i agradabel”. Su promé disertashon na 2005 tabata – kontrali na su kustumber i kontra su hasí – ‘un diskurso largu’, Verbeet ta kòrda.
Resientemente, den un di su último debatenan den Tweede Kamer ku su predesesor Plasterk, por a nota algu di iritashon. Knops a ekspresá su disgustu ku e aktitut ku, manera e tabata mir’é, tabata desinteresá di kabinete Rutte II ora tabata trata di hasimentu di invershon den e wardakosta di e islanan.
Durante e último lunanan Knops tabata enbolbí ku e negosiashonnan pa e kabinete nobo Rutte III, na nòmber di su partido CDA. Un bosero di CDA ta bisa ku na e momentunan akí e no por bai den preguntanan tokante e funshon nobo di Knops. Lo huramentá e kabinete djaweps awor, 26 di òktober.
| Dikon no un minister? Ta pone Sekretarionan di Estado riba ministerionan pisá, o sea ministerionan ku mester di atenshon speshal riba sierto área di gobernashon. Un sekretario di estado ta sostené e minister, pero e último akí ta keda responsabel pa e maneho. Ambos tin ku duna kuenta i rason na Parlamentu. E echo ku awor no tin un minister so pa Relashonnan di Reino, no ta dje sorprendente ei. Durante kabinete Rutte II Plasterk tabatin su mannan yen kaba ku diferente di dossier-nan difísil. Despues di e orkan destruktivo Irma esakinan a oumentá so na kantidat. |
