WILLEMSTAD – Klasifikashon di funshon por ta un manera pa solushoná e problemátika di salario mínimo, segun Kenneth Valpoort, sekretario general di Horecaf, e sindikato ku ta representá trahadónan den sektor di horeca.
Trahadónan den e sektor di horeca, ta forma un grupo grandi dje 17 mil kobradónan di salario mínimo na Kòrsou. E siman aki e sindikatonan uni a reanudá e akshonnan, despues ku gobièrnu a insistí riba e oumento di salario mínimo na 9,17 pa ora. Mientrastantu e sindikatonan a para e akshonnan.
Dulce Koopman a papia ku Kenneth Valpoort
Gobièrnu a kumpli ku dos dje tres eksigenshanan. Ta trata di anulashon di oumento di prima di Seguro WA i sindikato Sitcom a sera akuerdo ku UTS tokante dje retironan na e kompania. E úniko punto ku ainda no tin akuerdo riba dje, ta e asuntu di salario mínimo.
Segun Valpoort práktikamente tur hende den e sektor aki ta gana salario mínimo. Sinembargo nan nó por a wèlga, pasobra nan lo a pèrdè nan trabou.
Valpoort ta splika ku ora ta menshoná salario mínimo, ta manera ‘palabra malu’. “Ta p’esei mi no por komprondé ku despues ku no a resultá ku e oumento di 80 sèn, na 2017 i otro oumento na 2018, gobièrnu a ninga tambe e oumento di 26 sèn.”
Horecaf ta hopi desepshoná ku e rechaso aki. E lider sindikal ta konvensí ku sektor di horeca por karga e oumento di 26 sèn.
Produktividat
Pa Horecaf suèldo mínimo i produktividat i mas asuntu ta kana pareu. “Pero si nos ta fókùs riba produktividat i mantené e sueldo minimo abou, nunka e trahadó por sinti su mes kontentu i satisfecho ku su trabou pa yuda produsí pa e dunadó di trabou.” Asina Valpoort a remarká.