‘Kòrsou mester bira ménos dependiente di importashon for di Venezuela’

17 January 2018 | José Manuel Dias

WILLEMSTAD – Ku òf sin embargo komersial mester sigui buska alternativanan pa hasi Kòrsou ménos dependiente di Venezuela i asina evitá e skarsedat di fruta ku tin n’e momentu aki. Esaki ta opinion di Francisco Lira do Estreito propietario di Mangusa Supermarket. “Aktualmente supermerkadonan tin skarsedat di prinsipalmente banana, patia, lamunchi, pampuna i awakati”, Do Estreito ta indiká.

N’e barkunan venezolanonan di fruta ku tin den Punda e situashon ta idéntiko i hopi konsumidó ta keda sin haña e fruta ku nan mester.“No tin banana, anto e tomatinan i awakatinan ku tin ta bini for di Santo Domingo ku ta hopi mas karu”, Manuel Mora, bendedó di fruta ta splika.

Watch on YouTube (opens in a new tab)

Outor José Manuel Dias

Problema ku Logístika
Pa algun tempu kaba diferente supermerkado a kuminsá ku importashon di fruta i berdura for di Repúblika Dominikana i Colombia pero ta konfrontá hopi problema di logístika. Pa falta di konekshon marítimo direkto ta dura muchu dia pa un kònteiner ku fruta yega Kòrsou. Konsekuensia di esaki ta ku e kalidat di e produktonan ta bai atras i hopi fruta ta yega dañá. Ta bini aserka ku e preis di flete ta mas karu i komo tal esaki ta hasi ku e preis di fruta pa konsumidó tambe ta subi.

Tipo di fruta
Tambe a kuminsá importá fruta i berdura for di Merka ku tin un konekshon marítimo muchu mas frekuente i stabil ku Kòrsou. Akinan tambe e supermerkadonan ta konfrontá problema ku sierto fruta. Frutanan manera banana, awakati i pampuna no por keda transportá den un kònteiner di friu pa motibu ku nan ta bira pretu i no ta hecha bon. For di Merka ta importá solamente fruta i berdura ku si por keda transportá den friu manera por ehèmpel patia, apelsina, apel etc.

Importashon for di Merka sinembargo ta sali muchu mas karu. No solamente e flete ku barku ta mas karu pero e fruta i berdura produsí na Merka tambe ta hopi mas karu ku serka e otro paisnan i sigur si kompará ku e preisnan di Venezuela.

Transporte aéreo
Un otro alternativa pa importá fruta i berdura pa Kòrsou ta hasiendo uso di transporte aéreo. Ounke e alternativa aki ta esun di mas efisiente i mas ideal e ta tambe esun di mas karu. “Nos ta negoshando ku kompanianan di aviashon pa haña un tarifa mas abou posibel”, Do Estreito a duna di konosé.

Dependiendo di e kosto di flete i e pais for di kual ta importá e produktonan e propietario di Mangusa Supermarket ta premirá un oumentu di preis di fruta i berdura ku entre 50 pa 100 porshentu .