CAPELLE – “Mi tabatin masha miedu, pero mi di: bo no tin nada di pèrdè. Kuminsá biba bo bida!” Ku e pensamentu ei e yu di Kòrsou Milendi Raphael (25) di Capelle eksaktamente un siman pasá a kita su peluka i a mustra henter Hulanda ku e tin kabes chinu.
A kompartí e sine di Milendi mas ku 2900 bia den un siman i el a haña míles di reakshon positivo. Di ‘bo ta mi héroe’ te ku ‘bo ta inspirá mi’. Riba social media hende no ta kaba di papia di e mucha muhé ku 20 aña largu pa motibu di bèrgwensa tabata warda un sekreto grandi: Alopecia, òf kabes chinu króniko.
Tabu
“Pa bo tin un enfermedat i pa bo desviá di e norma den komunidat antiano ainda ta un tabú”, Milendi ta konta. “Por ehèmpel kanser, depreshon òf otro enfermedat króniko, nos antiano no ta papia di nan fásil.”Pa motibu di e tabu aki Milendi a tene su enfermedat un sekreto. Pero esaki no tabata e úniko motibu.
‘Pa bo tin un enfermedat i pa bo desviá di e norma den komunidat antiano ainda ta un tabú’
E manera ku hòmber hóben ta mira hende muhé hopi tempu a stroba Milendi di ta ken e ta. “Ora di sali nunka mi no por tabata mi mes. Mucha hòmber tin un sierto idea kon mucha muhé mester mustra: preferiblemente ku kabei largu i no falsu. Anto ta ken ke un muhé chinu?” Pa Milendi e promé datenan pa e motibu ei semper tabata kuminsá ku un mentira: no bisa nada di su kabes limpi bou di e peluka.
Esaki a kuminsá for di su dieskuater aña ku pida kabei falsu i for di su diesshete aña el a bisti peluka. “Un asuntu masha karu pasobra seguro no ta paga peluka djis asina”, Milendi ta splika. “Si nan pag’é mes bo por bai solamente serka un trahadó di peluka ku e seguro ta skohe. Aki na Capelle tin dos i nan tin peluka oropeo so. Nan no ta keda mi niun tiki nèchi. Milendi no ta haña ku ta hustu: “un plancha òf un brel si nan ta paga normalmente.”
‘Un plancha òf un brel si nan ta paga normalmente?’
Sufriendo di gañamentu i inkomodidat basta tempu Milendi tabata pensa di mustra mundu “su persona di bèrdat”. “E peluka tabata un protekshon pero un molèster grandi tambe”, e ta konta. “Mi tabata landa sin hinka mi kabes bou di awa. Den parke di atrakshon mi tabatin miedu di drenta den e karedanan rápido i ora di sali semper mi tabata inkómodo: miedu pa mi peluka no lòs kita kai si mi soda. Yen di kos chikí ma nan tabata dominá mi bida.”
Inspirashon
Despues di añanan di lucha i preparashonnan mental Milendi a disidí eksaktamente un siman pasá di kita su peluka. Pero no pa su mes so: “Mi ke inspirá otronan tambe. Pa motibu di e hopi reakshonnan ku mi a haña mi sa ku tin hopi nesesidat pa papia abiertamente tokante e kosnan aki. Un señora a skibi ku asta su kasá i su yunan nunka no a mir’e sin peluka.”
Finalmente Milendi ke duna peluka i tep i triki na hende ku ainda no ta kla pa sigui nan bida sin peluka. E mes tampoko no ta kana sin peluka tur ora, solamente ora e tin gana. “Awor mi por skohe pa bai riba un date sin peluka. Mi ta liber.”
Kiko ta Alopecia?Alopecia ta un enfermedat di e sistema imün ku komo konsekuensha tin kaida di kabei. E pèrdida di kabei i e insiguridat di e progreso di e enfermedat ta hasi e pashènt ku Alopecia insigur. Kasi semper Alopecia ta kousa strès i miedu, i esaki por bira depreshon. Investigashon na Estádos Unídos i Oropa ta mustra ku 1.7 porshento di tur hende promé ku nan di sinkuenta aña a eksperensia un di e formanan di defekto outo imün. Na Hulanda posiblemente lo ta trata di 280.000 hende (1.7 porshento di 16.7 mion) Fuente: Haarstichting.nl |
