Bienestar di animal: Regla i kastigu menos stringente den Karibe

Portrèt: Pixabay

14 February 2018 | John Samson

DEN HAAG – Kastigunan hopi mas abou pa maltrato di animal i pèrmitimentu di kouchi ku galiña pegá riba otro (‘bateria’) pa pone webu. Gobièrnu hulandes no ta mira motibu pa introdusí e reglanan stringente di Hulanda den e munisipionan ekstraordinario Boneiru, Saba i Sint Eustatius.

Esaki por konkluí for di e kontestanan di minister Carola Schouten di Agrikultura enkuanto bienestar di animal riba e islanan. Partij voor de Dieren (PvdD) a hasi pregunta na òktober riba e diferensha entre Hulanda europeo i Hulanda karibense.

Bateria kuestioná na Europa
E partido ta mira, por ehèmpel, ku na Boneiru tin un chiké inmenso ku band’i 10.000 galiña pegá riba otro den kouchi ta pone webu. Baterianan asina ta kuestioná: ta konsiderá esaki maltrato di animal na Europa i p’esei esaki ta prohibí na Hulanda europeo for di 2012. Gobièrnu hulandes mes no tin intenshon pa prohibí e tipo di baterianan akí den e ‘munisipionan’ karibense.

“Uso di bateria pa pone webu ta prohibí den Union Europeo i no ta konta pa Hulanda karibense”, Schouten a kontestá. Ademas e ta haña ku e bienestar di animal na Boneiru, Saba i Sint Eustatius ta responsabilidat di e outoridatnan lokal mes. “Mi no ta mira motibu pa for di Reino nos stipulá regulashon pa Hulanda karibense.”

Kastigu bastante mas abou

Tin un kódigo penal diferente ta konta na Boneiru, Saba i Sint Eustatius. E diferenshanan den kastigu pa maltrato òf deskuido di animal ta remarkabel. Por ehèmpel: Hulanda tin un pena máksimo pa maltrato di animal di tres aña di prizòn òf un but di kasi 20,000 euro (16,000 dòler). Si bo kometé e mesun delito den e munisipio ekstraordinario Boneiru, bo por haña maksimalmente seis luna kastigu di prizòn òf un but di maksimalmente 2,800 dòler (2,300) euro.

PvdD ker a sa si e kastigunan tin un funshon preventivo sufisiente den e munisipionan karibense. Pero minister Schouten ta bisa ku e no por bisa nada di esei, ni den ‘sentido general’ pasobra Ministerio Públiko (‘OM’) no por duna un ‘bista kompleto’ a base di ‘algun kaso’.

“Lo mi pidi OM BES pa den futuro nan registrá kasonan (penal) ku ta trata maltrato òf deskuido di bestia komo tal”, Schouten (ChristenUnie) a bisa.

Animalnan lòs
Por lo demas PvdD ta mira un ‘problemátika di animalnan lòs’ riba e isla. E partido ta deseá – meskos ku e organisashonnan pa bienestar di animal riba e isla – pa e minister hulandes konvensé e outoridatnan lokal pa introdusí registrashon obligatorio pa tur kacho i pushi riba e isla.

Pero esei tampoko e minister ta faboresé. “Ta na e órgano públiko Boneiru mes pa evaluá si mester pone identifikashon i registrashon komo algu obligatorio.”