ORANJESTAD – Refineria di Aruba (RdA) tabata premirando problemanan cerca Citgo Aruba desde aña pasa caba.
Poco poco e placa di Citgo tabata caba pa e proyecto di rehabilitacion , asina director di RdA, Alvin Koolman ta splica. Pa e prome fase nan mester di 100 miyon dollar. “Nan no por haya fiansa si nos no firma. Y door cu nos nunca a firma, nos sa cu nan no a haya fiansa. Pues tur e periodo ki ta Citgo Aruba tabata paga. P’esey tabata premira cu nan no por sigui asina.”
Kiebro di contracto
Pa prome cu oktober 2020 e upgrader mester ta operando y produciendo 209.000 bari pa dia. Si no gobierno di Aruba lo por kibra e lease a base di incumplimento. Segun Koolman, e rehabilitacion di e refineria ta canando atras di tal forma, cu si pa cuminsamento di otro aña e situacion ta mescos cu awo, e deadline lo no wordo alcansa.
Sinembargo e tin fe den e ehecutivonan Mericano di Citgo y e ta compronde nan decision pa warda y busca cambio. Pero si yega na un kiebro di e contracto cu Citgo y lo bin un operado nobo cu kier keda cu e upgrader, atrobe ta depende di Venezuela pa mande crudo. “Y si tin sancionnan, e no por wordo cori.”
Alternativanan
Koolman ta bisa cu un otro posiblidad ta cu lo rehabilita e refineria mes. Pero riba un escala mas chikito. Esaki ta rekeri un inversion grandi si. “E refineria awor no por produci productonan manera gasolin, diesel y esey ta haci Aruba masha vulnerabel.”
E ta bisa tambe cu semper nan tin e terminal di e refineria si cu ta duna su ganashi pa hopi aña caba. “Tin un plan B pero awor nos ta mara ainda na e contracto te 2020.”
Corupcion
Na november 2017 ehecutivonan di PDV Holding, compania madre di Citgo Aruba, lo mester a bin duna splicacion riba con lo sigui cu e trabounan den e aña siguiente. Sinembargo, autoridadnan Venezolano a detene casi tur ehecutivo riba sospecho di corupcion. Despues cu nan a nombra un top nobo, ehecutivonan di Citgo Petroleum na Merca a tuma rienda di e proyecto y nan a dicidi pa frena e proyecto.
“Tabatin un diferencia grandi entre e grupo di Venezuela y esun di Merca”. Segun Koolman e team di Merca ta mas profesional y sa nan trabou.
Por lo pronto Citgo Petroleum ta pagando su empleadonan, belasting y huur di facilidadnan na ora. Koolman ta indica sinembargo cu contratistanan no ta hayando nan pagonan na ora. Un contratista di e ‘mancamp’ ya a confisca e edificionan. Segun nan Citgo ta debe nan y nan tin miedo di no haya nan placa awor cu a para e operacion.
