WILLEMSTAD – Diariamente pashentnan ta ekspresa nan malkontentu tokante di nan dokter i speshalistanan. Ta pesei e situashon aki mester haňa atenshon urgente, segun spesialista di ARBO, Arthur Nivillac. “Si tin un Konseho di Pashènt (Patiëntenraad), e por investigá si di berdat e pashènt su keho tin base.”
Mientrastantu Sint Elisabeth Hospitaal (Sehos) a disidi pa internamente lanta un Konseho di Kliente. Raiza Kibbelaar, bosero di Sehos ta bisa ku esaki ta algu nobo.
Bosero Raiza Kibbelaar y spesialista di ARBO Arthur Nivillac riba kehonan di pashènt
E Konseho di Kliente ta konsisti di maksimalmente shete persona. E ta traha ku un plan di aňa, ku ta indika kua ta e topikonan ku tin mester di atenshon. E miembronan di e Konseho di Kliente, ta bira partner di kombersashon ku direktiva di hospital. Nan lo duna konseho na Konseho di Direktiva. Esaki relashona ku asuntunan ku ta importante pa e pashènt.
E Konseho di Kliente di SEHOS, no ta atende kehonan individual. “Pa esei nos tin den servisio, un funshonario di reklamo”. Asina Susanne Pendjol-Klarenbeek ta bisa.
Investigá keho independiente
Spesialista di Arbo, Arthur Nivillac reglarmente ta haňa petishon di klientenan pa outorisashon pa buska un ‘second opinion’ den eksterior. E petishonnan ta prinsipalmente pa bai Colombia, Santo Domingo i Hulanda. Esei ta un prueba segun Nivillac, ku mester bin un instansha ku ta atende seriamente ku e inkietut dje pashèntnan.
“Mi ta opina ku mester evalua si e sentimentu dje pashènt ta fundá si òf nò.” Un Konseho di Pashènt por investigá keho di pashènt independiente, segun e spesialista.
Nivillac ta splika ku tur hende por tuma e inisiativa pa lanta un organishon pa sali na bienestar di pashèntnan. Un organisashon asina por ta asistí dor di profeshonalnan den entre otro e ramo di medisina.
