WILLEMSTAD – Dilanti Korte di Apelashon Ministerio Públiko a bolbe eksigí un kastigu di 26 aña pa Burney ‘Nini’ Fonseca, kaminda ta akus’é di ta fungi manera un intermediario pa yega na e personanan nesesario pa por realisá un krímen.
Abogado general Angela a indiká den e kaso Magnus/Maximus aki den su rekisitorio ku e kaso aki ta unu pekuliar, ku a sakudí komunidat di Kòrsou, pasó a asesiná un parlamentario.
Abogado di Nini Fonseca, Marije Vaders tambe ta di opinion ku ta trata di un kaso pekuliar i tristu, den kual a asesiná un parlamentario, pero e ta kere ku hustamente p’esei mester hasi e investigashonnan korekto i den kaso ku no tin e pruebanan kontra di un sospechoso, e mester por rekobrá su libertat.
Testigu Kuwas no ta kòrda
A trasladá Elvis Kuwas, alias ‘mònster for di Ulanda pa Kòrsou’, p’asina e fungi komo testigu den e kaso ku Nini Fonseca a apelá, komo ku e ta keda para riba su inosensia den e kaso di asesinato di Helmin Wiels. Remarkabel durante tratamentu dje kaso tabata ku e testigu Kuwas riba diferente pregunta tabata kontestá di no ta kòrda muchu bon.
E inseguridat i duda den su kontestanan asta tabata kousa iritashon serka miembronan dje hurado di Hòf. Momento ku abogado Vaders tabata hasi un seri di pregunta na Kuwas, e tabata bisa di a duna kontesta riba e preguntanan ei kaba i e no tabata mira dikon e abogado tabatin ku puntr’é estupides.
‘Bo mester bin pa mi kibra bo kara pa bo’
E akusado Nini Fonseca a apstené su mes di papia durante e kaso. Sinembargo, na momento ku su abogado tabata hasi pregunta na Kuwas, el a hasi uso dje oportunidat pa puntra Kuwas ku si e, esta Nini Fonseca tabata na kas di Pretu i si ta e, esta Nini Fonseca a duna plaka pa a asesiná Helmin Wiels.
Esei a kousa hopi iritashon serka e testigu Kuwas, kende a bisa: “Bo mester tabata den e sala aki pa mustra bo kara. Bo mester bin pa mi kibra bo kara pa bo.”
Wes Hubben a mustra e testigu ku mirando su kontestanan ku tabata poko dudoso i tabatin kosnan ku e no ta kòrda, e tabata ke mas klaridat i kontestanan un poko mas spesífiko. Pero Mònster tabata indiká ku el a kontestá tur e pregutanan kaba anteriormente, pues e no ta keda ripití e mesun kosnan.
Demanda
Abogado Marije Vader dilanti Korte – potrèt Ramòn Yung
Pa Ministerio Públiko, tin sufisiente prueba dje diferente otro testigunan manera Michael Lesie, sr. Cijntje, partner dje testigu i tambe SMS ku a haña den telefòn dje akusado, kaminda e tabata komuniká ku Jorge Jamaloodin. Mirando e materialnan di prueba ku Ministerio Públiko ta dispone di dje, abogado general a bolbe eksigí un kastigu di prisòn di 26 aña pa e akusado. Abogado Vaders lo hiba su defensa mañan mainta, kaminda e lo bai tin un presentashon riba Powerpoint, p’asina desbaratá e ponensia i akusashonnan di Ministerio Públiko.
