AMSTERDAM – Hulanda lo pidi despensa e bia aki? Atrobe e pregunta tabata den kabes di e bishitantenan durante di e konmemorashon di sklabitut na Amsterdam. “Esun di mas bunita i fuerte ku a yega di tuma lugá’, segun e diseñadó di moda kurasoleño Laurindo Andrea.
Huntu ku un bon amigu e ta kana den e desfile promé ku e konmemorashon i selebrashon na Oosterpark. “Na e oumento di e kantidat di presentenan i e atenshon pa e konmemorashon bo por mira ku e tópiko ta biba bou di mas i mas hende i ta bira mas fuerte”
E despensa ku Andrea i su amigu a spera di tende no a bini. Pero e konmemorashon a impreshon’é visiblemente.
Laurindo Andrea na man drechi ku su ‘Tas di Kòrsou’- Potrèt: kolekshon privá
“B’a tende e spich kaba di Marian Markelo? Bo mester tend’é, bo kurpa ta kue rel!”, Laurindo ta bisa ora e topa un konosí ku ta para warda serka su baiskel.
“E aña aki henter e evento tabata radia un forsa i speransa enormemente sigur di su mes i afektuoso: berdaderamente nos a yega i e despensa ei tambe lo bini un dia.”
Duele si, despensa nòE alkalde di Rotterdam Ahmed Aboutaleb djasabra a bisa den su spich di konmemorashon ku gabinete hulandes ‘mester pidi despensa pa e pena ku a kousa míles i míles di hende’ den tempu di sklabitut. Gabinete hulandes den un deklarashon a laga sa ku nan ta mantené na e ekspreshon di duele ku e gabinete anterior a duna, pero ku nan lo no kumpli ku a apelashon di e alkalde di Rotterdam. |
Laurindo ta karga un tas di kueru remarkabel, ku elemento di bandera di Kòrsou. Ta mas parti bandera surinameño ta mira riba e dia kalor ku hopi solo aki. Pero den e multitut por mira tambe un bandera di Kòrsou, esun di Collin Edson di Amsterdam.
Collin ta orguyoso di – i alabes krítiko riba e dia aki, e ta konta. “Nos ta konmemorá i nos ta selebrá. Pero bon mirá no ta kos di selebrá ku añanan largu a kita libertat di nos antepasadonan. Esei ta dos diferente banda di e mes evento.”
Collin Edson ku bandera di Kòrsou – Potrèt: kolekshon privá
Edson i Laurindo ta dos di e poko yunan di Kòrsou presente. Edson ta haña esaki lástima, pero e ta kere tambe ku e sa ta dikon: “Ta manera nos no ke rekordá sklabitut pasobra nos ta asosiá esei ku víktima. Nos ta preferá di selebrá héroe manera Tula ku na 1795 tabata lider di e rebelion di esklabo mas grandi den historia di Antia.
Tòg Collin Edson ta spera ku tin mas hulandes antiano den e marcha. “Otro aña di bèrdat mi ta bai traha riba esaki.”
