WILLEMSTAD – Empresario di agrikultura na Kòrsou no por demandá sèn di e fondo nashonal di konstrukshon di dos mion florin, ku gobièrnu a pone na banko PBS. A fris e dunamentu di kredit te próksimo aviso.
Agrikultor no ta haña nada tampoko serka Obna (Banko di desaroyo di Antia Hulandes), ku te ku lantamentu di e fondo di agrikultura tabata é dunadó di kredit pa agrikultura, krio di bestia i peskeria.
Plannan pa agrikultura duradero
Minister Suzy Camelia-Römer di Salubridat, Medio Ambiente i Naturalesa a anunsiá poko tempu pasá ku den sinku aña Kòrsou mester tin agrikultura duradero.
Segun kunukero Wendel Alberto, tesorero di e koperashon di agrikultura na Bandabou, esaki ta posibel basta gobièrnu sostené e agrikultornan finansieramente, introdusí legislashon fisiosanitario i aktua severamente kontra ladronisia i vandalismo.
No ta konosí ki tempu por bolbe entregá petishon pa un fiansa di e fondo di agrikultura. “Minister Camelia-Römer a indiká ku e fondo di agrikultura ta den revishon”, segun Wilbert Geertruida, presidente di Adeck, e asosiashon pa negoshi mediano i chikí.
Tin muchu opstákulo
Segun Geertruida promé ku e medida ministerial aki, tambe tabata kasi imposibel pa haña un fiansa di e fondo. “E petishonario mester entregá un business plan, kumpra e produktonan nesesario e mes i entrega e bòn di esaki, i kumpli na hopi otro eksigensia mas”, Geertruida ta bisa. “Tin muchu opstákulo. E resultado ta ku den kuater aña di tempu di e dos mion ku tin disponibel a duna solamente 100 mil na fiansa.
E presidente di Adeck ta spera ku e kredit di agrikultura lo bira disponibel pronto, ku kondishonnan mas fleksibel, pa asina empresario desapuntá ainda por bini na remarke pa un fiansa.
