WILLEMSTAD – Aki algun aña lo tin un skarsedat di spesialista médiko den kuido na Kòrsou. E kousa di esaki ta un kombinashon di médiko ku a alkansá edat di penshun i ‘yu di tera’ ku no ta bini bèk despues di nan estudio médiko na Hulanda.
Esei ta e konklushon ku ‘Asosiashon di Médiko di Antia’ (AMA) ta saka for di e database ku aktualmente nan ta finalisando. Sekretario Priscilla Martis ta splika ku a lanta e asosiashon na òktober di 2017 pa por adaptá e petishon pa médiko na e islanan mihó na e oferta di médiko antiano ku a studia na Hulanda.
Redusí ‘braindrain’
AMA ta trata di redusí ‘braindrain’ (salida di hende ku edukashon haltu for di e islanan) Un di e promé pasonan pa alkansá e meta aki ta di hasi un inventarisashon. Di un banda di studiante antiano ku ta sigui un estudio médiko na Hulanda i di otro banda di spesialista ku aktualmente ta traha na Kòrsou.
Pronto e lista aki lo sali disponibel na ministerio di Salubridat Públiko, Medio Ambiente i Naturalesa, pa asina ‘nos mes hendenan’ por yena e faltanan ku por ferwagt den futuro serkano kaba. “Nos a firma un deklarashon di intenshon ku minister Suzy Camelia-Römer i direktor di hòspital Franke Scheper. Ku esaki nan ta primintí di tene mas kuenta ku e médikonan i paramédikonan for di Hulanda”, segun Maria.
Reintegrashon
Un ehèmpel di un hende ku a hasi esaki kaba ta Vito Koeijers. Seis luna pasá el a bini Kòrsou bèk na petishon di Hospital Sint Elisabeth (SEHOS). I ounke Koeijers por a pensa sufisiente motibu pa no hasi esaki – manera e mes ta bisa, no ta pòrnada el a traha binti aña na Hulanda – tòg el a reakshoná riba e petishon.
Segun Koeijers e diferenshanan ta grandi. Aki mester yuda kurpa, Sehos ta mas ku 150 aña bieu. Bo mester improvisá komo médiko. I esei ta pone tambe ku bo mester respetá e hendenan ku a traha aki tur e añanan ei. Ku ménos tòg nan por a yuda hopi hende. Ke men pa traha aki tin su bandanan positivo tambe; bo ta siña adaptá i di ta fleksibel”, e ta konta.
E hòspital nobo den konstrukshon. Potrèt Roelie van Beek
Hòspital nobo
E problema di material inferior, bieu i mal mantené ku e médikonan na Kòrsou mester traha kuné awor, promé ku e último kuartal di 2019 mester ta algu di pasado. E ora ei ta bai usa e Hospital Nobo Otrobanda (HNO). Mester a entregá e hòspital nobo for di 2017, pero tabatin hopi retraso i gastu mas haltu. Konsehero di komunikashon stratégiko Clifton Wallé ta mira e hòspital nobo komo un punto den kambio di kuido na Kòrsou. Tòg pa loke ta personal ainda tin di hiba un lucha.
“Un hòspital nobo ku material nobo, ta nifiká tambe proseso nobo di kuido. Personal di Sehos aktualmente ta den un transishon kaminda nan mester familiarisá ku e prosesonan nobo. Mester trein nan di nobo òf adishonalmente pa duna mihó servisio.” I segun e esaki lo bira hopi mas interesante pa e Yu di Kòrsou pa bini e isla bèk.
