WILLEMSTAD – E barku ‘Seven Seas’ ku artíkulo di ousilio pa Venezuela ainda no a sali pa Boneiru òf Venezuela. Asina Carlos Rivas di Venex, e organisashon di interes venesolano na Kòrsou, ta bisa. E no por bisa si awe sí e barku ta sali pa Boneiru.
Un otro barku, ‘Midnight Stone’, ku artíkulo di ousilio ku a kolektá na Puerto Rico, djasabra a desviá pa Boneiru. Djadumingu e barku a sali pa Kòrsou, asina duana di Boneiru ta bisa. Midnight Stone tin nuebe container ku kuminda i remedi na bordo. Ta laga e artíkulonan atras na Kòrsou i despues e barku lo bai Puerto Rico bèk.
Hub
A indiká Kòrsou komo un di e hubnan logístiko humanitario pa ayudo di Estádos Unídos i otro pais na Venezuela. Ta difísil pa hiba e artíkulonan di ousilio pa Venezuela, pasobra e presidente venesolano Nicolas Maduro ta mira e ayudo komo un kampaña pa bah’é.
Djabièrnè i djasabra Kòrsou a para e salida di Seven Seas pa Venezuela, pasobra gobièrnu ta insistí riba ‘ekspedishon seif di e artíkulonan di ayudo pa Venezuela sin preshon’. A base di koperashon i rèspèt mutuo, e artíkulonan humanitario lo yega Venezuela na momentu ku sirkunstanshanan ta permití esaki i ku ta seif sin ningun forma di resistensia”, gobièrnu di Kòrsou ta bisa. P’esei Seven Seas ke desviá pa Boneiru i djei nabegá bai Venezuela.
Ayudo di Hulanda
Hulanda lo yuda Kòrsou di mart pa ougùstùs ku akohida di venesolano. Spesífikamente ku identifikashon i registrashon, akohida i trato i ku e maneho di regreso i deportashon di ‘strañero’. Esaki sekretario di estado Raymond Knops a primintí promé minister Eugène Rhuggenath. Hulanda lo yuda tambe ku plaka i material pa vaksinashon i otro ayudo médiko pa e grupo aki. Hulanda a ofresé tambe pa yuda ku kombersashon entre Kòrsou i e organisashonnan internashonal di ayudo.
