WILLEMSTAD – E siman aki, un tim multidisiplinario guiá pa MEO, a tene vários kòntròl severo den diferente supermerkado na Kòrsou, kaminda a konstatá bastante karni i otro produkto kaduká. Apesar ku a aploudí e kontrol, tòg a kuestioná dikon e establesimentunan aki por a bende merkansia kaduká indetektabel pa tantu tempu.
Según Dr. Joe Alcalá, Sector Direktor Interino di Departamentu di Salu, tin un lei di etikèt, pero no ta kontrolá esaki sufisiente pa falta di personal. Tambe tin un lei di regulashon di matamentu di karni kòrá, pero no pa karni blanku manera galiña, i e situashon ta birando dia pa dia mas preokupante.
Un reportahe di Deya Mensche
Según Dr. Alcalá, ta bira tempu pa trese e kontrolaria di galiña bou di asuntunan vetinerario, paso esaki tin e infrastruktura, mihó ku GNGZ (GGD) pa hasí esaki. Aktualmente a prohibí importashon di galiña i karni fo’i Brazil, paso tin un skandal andando serka 21 fábrika di galiña i karni kòrá ku no ta tene nan mes reglanan di Union Europeo.
Rudney Martina hefe di karniseria Centrum Mahaai
Plan di higiena
Ret Karibense a kòmbersá ku karniseronan di tres supermerkado, kual ta van der Tweel na Zeelandia, Centrum Mahaai, i Mangusa Hypermarket, kende a splika nan prosedura di higiena i nan kadena di friu. Gilberto Gonçalves di Mangusa Hypermarket a splika kon nan tin e promé dòk di deskargamentu ku ta kompletamente friu i asina ta garantisá ku e kadena di friu ta keda sigurá. Según Jan Wouter, karnisero prinsipal di van Der Tweel, e supermerkado ta gosa di un di e karniserianan mas sofistiká i higiéniko riba nos isla paso nan ta utilisá un plan di higiena según reglamentunan di karniseria stipulá pa HACCP.
E sertifikashon di HACCP (Análisis di Peligro i Puntonan di Kontrol Kritiko) di SGS, tei pa mehora e maneho di seguridat di alimentashon i kalidat di e produkto internashonalmente, pero ainda no tin un lei pa obligá supermerkadonan pa e karniserianan ta sertifiká pa HESSUP (HACCP). E úniko manera di garantisá ku e produkto ta bon, según Dr. Alcalá, ta pa kontrolá estriktamente na nos fronteranan, pero e ta enfatisá ku awor si mester tuma e lei di Materia Prima i etikèt mas estrikto.
Joe Alcala, Sector Direktor Interino di Departamentu di Salu
Remarkabel ta ku niun supermerkado na Kòrsou ta etiketá e produkto adekuadamente i ainda esaki ta falta hopi informashon esensial, manera pais di origen, ki dia e animal a mata e animal i ki dia e produkto lo kaduká. Un otro problema ku e kòntròlnan di e siman aki a revelá, ku tin hopi karni i komestibel kaduká ku ta ser bende ku un deskuento. Tur tres supermarket a atmití ku ainda nan manera di etiketá no ta según lei. Karnisero prinsipal di Centrum Rudney Martina, a kompartí e plannan di Centrum pa introdusí e sistema di etikèt nobo e aña aki.
Etikèt sofistiká
Na su turno, Sr. Wouter a splika ku van der Tweel tin un mashin di etikèt sofistiká, pero ainda nan no ta usando esaki optimalmente, pero ta spera ku na yüni di e aña aki lo introdusí esaki. Tambe el a enfatisá ku van der Tweel ta e úniko supermerkado ku ta indiká un fecha di vensementu riba nan etikèt.