Konseho pa Mantenshon di Lei ta alertá den su mas resien Estado di mantenshon di lei den Karibe hulandes 2025 ku e mantenshon di lei na Boneiru, Sint Eustatius (Statia) i Saba ta sigui strukturalmente vulnerabel, i lo no ta duradero sin refuerso drástiko.
Segun e Konseho kapasidat, monitoreo di frontera, interkambio di informashon, detenshon, kuido forénsiko i atendementu ku kriminalidat hubenil ta permanentemente bou di preshon. Pareu ku esei e riesgonan pa siguridat ta oumentando den e region di karibe pa motibu di krimen organisá ku ta hasi uso di strukturanan legal, tenshonnan geopolítiko, i preshon sosial kresiente riba e islanan.
E Konseho ta konstatá ku e ministerio hulandes di Hustisia i Siguridat ta tumando pasonan importante, i ta di akuerdo ku e análisis anterior di e Konseho, pero ku ainda no ta mira sufisiente medida konkreto den áreanan krusial. P’esei e riesgo ta keda eksistí ku ta djis parsialmente òf muchu pokopoko ta solushoná problemanan struktural.
Limitashon- i bashínan struktural
Preokupashon spesial tin pa e situashon na Saba i Statia. Segun e Konseho e kadena penal i di siguridat ta funshoná ku limitashon- i bashínan struktural einan. Problema di kapasidat, falta di provishonnan lokal, i e dependensia di Bonaire ta kondusí na desigualdat hurídiko pa e habitantenan di e islanan akí.
Eksplísitamente e Konseho ta pidi atenshon tambe pa e falta (ketu bai) di direkshon sentralisá pa trahamentu a base di informashon den e hùb marítimo, e problemátika kresiente rondó di kriminalidat hubenil, e infrastruktura digital defisiente den e kadena hudisial, i e riesgonan rondó di interkambio di dato den e Reino.
Por último, e Konseho ta enfatisá ku protekshon di e órden hudisial den e parti karibense di e Reino ya no ta solamente un problemátika lokal, sino un problemátika di siguridat stratégiko pa henter e Reino Hulandes.
Nesesidat pa refuerso
Enfátikamente e Konseho ta hasi un yamada na e ministernan konserní pa reforsá e organisashonnan hudisial finansieramente, organisatoriamente i pa kapasidat duradero, i tambe tradusí plannan di maneho lihé den medidanan konkreto i ehekutabel, ku terminonan bon kla.
E Estado di e mantenshon di lei Karibe hulandes 2025 ta disponibel riba e wèpsait di e Konseho pa Mantenshon di Lei (www.raadrh.com).
