ORANJESTAD – Ta un di e temanan di mas papiá den e lucha elektoral aktual na Aruba: e pregunta si por legalisá uso di cannabis pa metanan médiko. Mayoria di e partidonan polítiko ta bisa ku nan ta pro. Pero ta algu ku e usadónan tambe ke?
Durante di e promé debate di e kabesnan di lista, mas promé e luna aki, tur partido ku a partisipá a indiká ku nan ta pro legalisashon pa uso medisinal. Ántes e tópiko aki tabata kompletamente tabú den polítika arubano. Durante e elekshon di 2013 ta un partido so tabata pro legalisashon, pero e aña aki ta manera e dos partidonan grandi, MEP i AVP, i e partidonan chikí nobo manera POR i MAS, ta mira posibilidat den mariwana medisinal.
Paso chikí
Andrani Geerman (34), un sushi-chef ku su propio restorant na Aruba for di edat di 18 aña ta sufri di gota ekstremamente pisá. Aktualmente e tin inflamashon na diesshete lugá na su kurpa. Geerman ta bisa ku e ta kombiná su remedinan regular ku kuminda vegetariano, suplementenan natural i humamentu di pitu kontra e doló.
E ta bisa ku uso di cannabis ta yud’é, pero e ta avisá kontra legalisashon sin bon investigashon. “Ta un área deskonosí. Promé ku bo sa bo ta bai bela yen anto senk e barku sin tin nodi. Pone paso chikí. Wak kon paisnan den regio ta hasié i siña di esaki. Den otro paisnan promé a dekriminalisá cannabis. Ei tambe ta uso medisinal so a legalisá. Ta trata espesialmente di edukashon. Informá bo pueblo i espesialmente muchanan promé ku bo kuminsá ku e kos aki.”
Tanten ku e ta ilegal médikonan no por studia e materia formalmente ni tampoko traha kuné, Geerman ta remarká. Dekriminalisashon p’e ke men ku esnan ku ta kultivá mariwana tambe mester ta envolví den e proseso pa bai un kultivashon legal kontrolá. Legalisashon di mariwana pa uso rekreativo ainda Geerman ta mira komo un paso muchu leu. “Sin edukashon esaki lo ta peligroso.”
Henter e mata
Si mariwana medisinal bira legal, Geerman ta haña ku tur hende tin derechi di disidí nan mes riba ki manera e ke tuma e remedi. “Por ehèmpel bo por usa zeta di cannabis òf pildora. Mucha ku outismo por benefisiá di esaki. Ma esaki no ta tur. Pakiko e mester ta optenibel solamente den forma prosesá, miéntras ku den forma natural e ta e mas mihó? Ami mes a ripará ku mi ta benefisiá di usa e mata hinté. Banda di hum’é tambe tur kos di e blachi i e stèki, te na e flor. Tur e partinan ei tin algu ku por yuda mi. Ke men laga nos bisa ku ainda mi ta sinti falta di un ingrediente importante den mi ‘power smoothie’ di tur dia.”