PHILIPSBURG – Hopi bestia di kas no a sobreviví orkan Irma na Sint Maarten, pero tin kachó tambe ku tin suèltu i ku lo evakuá huntu ku nan doño – òf ku hende ku stima bestia – for di e isla.

E kuater organisashonnan di protekshon di bestia riba e isla entretantu a logra kue kasi tur kachó i pushi ku a hui, pero pa hopi bestia di kas orkan Irma a resultá fatal. Tin kaminda ku por sinti e holó stinki di kadaver putrí di bestia di kas morto, mayoria parti bou di e restonan di e demolishon i inalkansabel.

Bestia di kas tin strès
“Mi a lòs mi kachónan promé ku e orkan” Terrance Rey ta bisa. “Mesora nan ta buska nan mes lugá pa skonde i despues di orkan nan a bini bèk. Pero bo ta mira awor ku asta un siman despues di e orkan ku e kachónan ku a sobreviví e desaster ainda tin komportashon di stress.

A laga kachó i pushi atras
Tin e relatonan desesperá tambe di hende ku mester a laga nan bestianan atras pasobra nan mester a evakuá den pura. Lisa Davis – Burnett ta konta di su bisiña, ku por a bai un kaminda mas seif ku su tata di edat hopi haltu. Desesperá el a pidi Lisa kuida su kuater kachónan i su kuater pushinan ku e mester a laga atras.

“Ta kon mi ta hasi kuida nan”, Lisa ta puntra su mes. ”Por lo pronto mi ta biba den mi ofisina ku mi mes kachó i tres kachó di kriansa, kasi mi no tin transportashon i mi ta pasa hopi trabou pa mi mes kome i duna mi kachó kuminda i awa.” E ta suspirá i ta hisa su mannan na laira.


Door Jean Mentens

Amor pa bestia ta motibu pa evakuá kachó
Otro kachó tin hopi suerte. Un avion di forsanan aéreo spañó aktualmente ta evakuá súpdito spañó. Un dama hóben di Madrid ta bai ku dos bench di avion ku kuater kachó den nan. “Ta kachó chikí ku a dualu i pèrdè. Awor mi ta spera ku nan ta laga mi subi ku nan”, e ta bisa, “promé nos ta bula bai Santo Domingo i despues nos ta bai Spaña.” E ta hasi e evakuashon di kachó aki pa amor pa bestia, riba su propio inisiativa.

Un pareha di Sint Maarten por a hiba nan kachónan teckel na bordo riba un buelo di evakuashon di Wardakosta. Potrèt: Jean Mentens