Portrèt: Natasja Gibbs

AMERSFOORT – Generalmente studiante di Karibe no ta buska ayudo sikológiko, miéntras ku hopi bia nan mester di dje si. Esaki Jean-Marie Molina, pedagogo i dosente di éksito di estudio na Hogeschool di Rotterdam ta konkluí.

Diariamente Molina ta guia studiante na Hulanda ku retraso den nan estudio ora di kaba e estudio. Entre nan tin studiante karibense tambe, pero nan hopi bia no ta kontentu ku ayudo sikológiko segun Molina.

‘Ata bo den bo kamber chikí den friu sin amigu ni famia’

Thaisja Suart (25) sa tur kos di esaki. Ora na 2013 el a muda di Kòrsou pa Hulanda pa studia, el a haña un burn-out i el a kai den un depreshon profundo.

Door Natasja Gibbs

Thaisja su relato segun Molina no ta un eksepshon. “Hopi bia mi ta mira un presensia haltu di depreshon serka studiante di Karibe, ku mayoria bia ta liá na heimwe”, e pedagogo ta konta.

“Ta eduká nos muchanan karibense den un ambiente sosial i djei na ta bini Hulanda kaminda nan no tin kasi niun hende. Hopi studiante e ora ei ta kai den un ‘dep’. Espesialmente si bo tabata sensitivo kaba pa depreshon un situashon asina ta traha manera un katalisadó.”

‘Hopi bia ta hasi bofon di enfermedat síkiko i ta konsider’é kos di makaku’

Ku òf sin ret sosial: studiante karibense bon mirá no ta atmití dje fásil ei ku nan ta sufri di keho síkiko. “Nos hendenan karibense ta sali for di ambiente hopi religioso”, Molina ta splika, e mes tin su ‘roots’ na Sint Eustatius. Ta duna splikashon pa enfermedat síkiko manera ‘oyada’, ‘e pikánan di e antepasadonan’, òf bo ta poseé.”

Pero no ta falta di religion so segun Molina: “Ta espesialmente e manera ku mayornan, amigunan i famianan ta reakshoná riba keho di depreshon. Hopi bia ta hari enfermedat síkiko, òf ta yama nan ko’i makaku òf flohera. Regularmente tambe mi ta tende: B’a bini Hulanda i mésora bo ta tuma e enfermedatnan ofer di hende blanku ku nan sikiaternan.

‘Studiante karibense mester ta ménos duru kontra otro’

Molina ta sostené e inisiativa di Thaisja pa konta e dosentenan hulandes kiko a yud’é durante di su depreshon. Pero Molina ta mira un tarea mas grandi den komunidat karibense mes. Mayornan karibense, dosente i espesialmente studiante nan ku nan mester para mas habrí pa otro su vulnerabilidat i papia ofer di esaki.”

Pero e studiantenan karibense mes segun Molina mester ta ‘menos duru kontra otro’ i tuma mas inisiativa pa sera amistat pafó di ‘nan mes hendenan’. “Mi ta ripará tambe ku tiki studiante karibense di nan mes ta hasi uso di e fasilidatnan na skol i ta bishita dekano òf sikólogo di skol. Esei ta piká pasobra bon mirá leu fo’i kas asina ta nèt e ora ei nan mester di e yudansa ei mas tantu.