WILLEMSTAD – Un grupo di siudadano preokupá pa e trato di refugiado venesolano na Kòrsou, a entregá un petishon na minister di Asuntunan Eksterior, Stef Blok.
Djis promé ku el a sali for di Fort Amsterdam kaminda tabatin un briefing di prensa tokante su bishita di trabou ku e promé ministernan di Sint Maarten, Aruba i Kòrsou, e bosero di e siudadanonan preokupá, Ieteke Witteveen, a entregá e petishon.
“Nos no por yuda nan pasobra nos tambe lo haña kastigu òf but”
E siudadanonan ta bisa ku nan ta masha preokupá pa e situashon i e trato di e refugiadonan venesolano, pasobra no tin un maneho kla. Nan ta spera ku instanshanan internashonal lo bai yuda e refugiadonan. I ku Kòrsou tambe por haña ayudo di organisashonnan ku ekspertisa i eksperensia.
“Nos tambe konosé refugiado venesolano direktamente rònt di nos. Pero nos no por yuda nan pasobra nos tambe lo haña kastigu òf but.”, Witteveen ta bisa. Segun e Kòrsou ta asta lat ku e preparashonnan.
Minister Blok ta bisa ku el a papia ekstensivamente kaba tokante esaki ku promé minister di Kòrsou, Rhuggenaath. “Awor mi ta bai Colombia kaminda en bèrdat e problema ta mas grandi. I kaminda nos lo bai wak tambe kon trata e problema.”
