ORANJESTAD – Gobièrnu arubano ta preokupá pa demanda nobo di kreditor riba e kompania di estado di zeta venesolano PdVSA, pasobra esakinan por afektá e refineria na e isla tambe.

E kompania di zeta merikano ConocoPhillips enbano a trata di pone beslag riba e tankinan di warda zeta di e refineria arubano, manera nan a hasi na Boneiru i Kòrsou. I despues riba e kontenido di e tankinan tambe.

“Wes a logra para esaki, pero esaki no ke men ku otro entidat tampoko no ta bai trata di ponee demanda. E bia aki nos a skapa”, segun promé minister arubano Evelyn Wever-Croes ayera.

Pero awe e situashon a kambia: Citgo Aruba ta den korte awor bringando Conoco Phillips cu tòg a disidí di pone beslag riba dos barku di krudo biniendo Aruba.

Plan di emergensia
Promé minister a pidi e refineria-doño pa bini ku un plan di emergensia. E refineria ta di e kompania di estado Refineria di Aruba i esaki ta hür e refineria ku Citgo Aruba. Esaki ta kai bou di e PDV-holding di PdVSA. Tambe e promé minister a pidi pa bini ku un suministradó alternativo di kombustibel ku no ta karu.

E situashon na Aruba ta diferente for di esun na Kòrsou i Boneiru, komo ku e refinerianan ei ta kai direktamente bou di PdVSA. Citgo Aruba, ounke e ta kai bou di e PDV-holding establesé na Estádos Unídos, ta un kompania lokal.

Rusia
Un kreditor eventualmente por purba di pone beslag riba akshon ku PDV-holding tin den Citgo Aruba. Pero un gran parti di esaki ta den man ruso kaba, segun promé minister Wever-Croes. Un wes mas aleu por disidí di pone beslag riba un karga di kombustibel di Citgo na kaminda pa Aruba, el a bisa ayera. Netamente esei a pasa awe.