WILLEMSTAD – Den kuadro di e promé ‘plastic attack’ e bishitantenan di Supermerkado Centrum na Piscadera a saka nan kompranan for di e emboltura di plèstik i a hinka nan den emboltura ku nan mes a trese i ku por usa di nobo.
A kolekta un seru di sushi di plèstik asombroso den e garoshinan di hasi kompra. Green Force Curaçao ta atendé e resiklahe di e plèstik.
Plèstik ta un problema enorme na Kòrsou, Shadiah Elhage, presidente di Clean Caribbean Curaçao, ku ta organisá e akshon, ta konta. Ku e akshon Elhage ke krea konsientisashon.
“Bishitante di supermerkado a spanta di tur e plèstik ku a bini di nan kuminda; esei ta eksaktamente loke nos a spera. Nos ke laga e hendenan mira ku nan mes por hasi algu na e problema di plèstik.”
“Nos isla ta masha shushi mes”
No tin sifra eksakto di e grandura di e shushamentu di plèstik na Kòrsou, pero Green Force kuminsamentu di e aña aki a eksportá mas ku 1 mion kilo di plèstik for di e isla pa resiklahe.
“Nos isla ta masha shushi mes”, Timo Brouwer di Green Force ta bisa. “E plèstik ta resultá den nos medio ambiente i den laman. E ta keda ei pa sentenar di aña òf e ta resultá den e piskánan ku nos ta kome. E morkoinan i paranan por stek aden.”
Brouwer ta mira mas i mas plèstik separá drenta na Green Force. “Ta manera porfin Kòrsou ta kla pa kuminsá resiklá. Tin tur sorto di proyekto di edukashon ku ta hasi hende konsiente di e surplus di shushi.”
Taha plèstik
Clean Caribbean Coalition ta koperá ku ministerio di Salubridat, Medio Ambiente i Naturalesa. “Nos ta traha na un legislashon nobo. For di yüli nos ke taha tas di plèstik grátis den supermerkado. Despues nos lo fiha riba tahamentu di kùp di plèstik, richi i baki di kuminda di foam”, direktor Gabriel Murray ta bisa.
Manager di Supermerkado Centrum gustosamente ta partisipá na e ‘plastic attack’. E ta mira un opstákulo tambe: “Nos ke ménos plèstik rònt di e produktonan ku nos ta bende. Ma nos mester tene kidou si pa e produktonan no bira mas karu pa e motibu ei. Si mi mester pidi un florin èkstra pa produkto, pa motibu di un emboltura ku ta bon pa medio ambiente, mi ta pèrdè mi klientenan.”
Nan mes por hasi e diferensha grandi
Segun Elhage e habitantenan di e isla mes por hasi un diferensha grandi kaba. “Kumpra un bòter di awa ku por usa atrobe i hiba bo mes kùp ora bo bai Starbucks. Ora di buska kuminda bai ku bo mes bakinan i laga nan saka e kuminda pone aden. Mayoria di restorant ta koperá gustosamente.