ORANJESTAD – Ku e promesa di un bida mihó i dokumento legal hòmber na Aruba ta lòk hende muhé ku ta ilegal den nan kas. Djei e portanan ta sera na yabi i e personanan sin dokumento no ta mira klaridat di dia mas.
Catelyn* (36), ku no tin státùs legal ainda, konosé muhé ku tabata será serka arubano den kas. E hòmbernan tabata primintí nan un pèrmit di estadia pa kriá di kas (live in). “Pero nan no ta regla nada. Nan ta sera nan den kas di moda ku nan no por sali pafó mas. “Sin nan purba hui ta para esaki ku menasa manera ‘si bo sali mi ta yama polis òf imigrashon’.
Catelyn ta konta kon vulnerabel bo ta komo muhé ilegal na Aruba
Magdaly Maduro, kordinadó di Fundashon pa Hende Muhé den Difikultat (FHMD, ku ta yuda muhé den situashon di violensia doméstiko) sa di e práktikanan aki.
Tur luna e ta risibí un promedio di tres víktima ku a sera den kas kontra di nan boluntat. Esakinan no ta solamente muhé ilegal sino tambe muhé di e isla mes. Luna pasá Maduro a tuma kontakto ku minister di asuntunan sosial. Esaki pasobra den un siman tres muhé venesolano ilegal ku a sera den kas i ku a logra hui, a akudí na e akohida di krísis.
“Ainda e tres muhénan aki ta keda aki”, e kordinadó ta konta. Kasi nan no ta papia di e loke nan a pasa aden. “Nan tabata masha reservá último tempu.”
‘Nan mester a kana rònt sunú henter dia’- kordinadó Magdaly Maduro
Tantu arubano komo no-arubano ta será e muhénan, Maduro ta konta. E ta kòrda bon bon un víktima binidero di Suramerika di 21 aña di edat. A buska e mucha pa bini Aruba pa bin kasa.
“E no a topa su kasá nunka anteriormente, pero mésora el a bai biba serka dje. Únabes den kas tur porta a sera na yabi, e no tabatin pèrmit pa bai niun kaminda i e mester a kana rònt sunú henter dia. Si e hòmber tabata tin gana e mucha muhé mester tabata dispuesto.”
Despues di un guera un anochi a saka e mucha pone pafó blo sunú i el a logra hui bai na e bisiñanan ku a hib’é FHMD. Ku donashon e fundashon a kumpra un teket pa e por a bai su pais bèk.
Vulnerabel
Catelyn ta bisa ku e státùs ilegal ta hasi e muhénan vulnerabel pa abusu. E mes tabatin un relashon ku un persona di e isla ku tambe ker a yud’é ku su papelnan. Pero rib’un dia e persona a pèrdè kòntròl i a dal e un bòftá. “Na e momentu ei mi no tabata sinti mi seif i protehá, pasobra mi no por a bai polis.”
I ta eksaktamente e pensamentu ei ku no ta klòp, Maduro ta enfatisá. “E ilegalnan no mester lubidá ku nan tin derechi, esta derecho humano básiko. Un kaminda den komunidat a lanta e fábula ku si bo entregá keho mésora ta deportá bo. Esei no ta bèrdat, ta trata bo keho meskos ku kualke otro.”
E ta stimulá e muhénan pa bai polis. “Sino loke e abusadónan ta hasi ta bira kustumber i bo ta duna nan chèns di sigui terorisá muhé.”
Akohida di muhé ilegal na peligerFHMD ta kalkulá ku mas o ménos 25 porshento di e víktimanan ku nan ta yuda ta ilegal. Diferente nashonalidat ta pasa: venesolano, kolombiano, haitiano i chines. E fundashon ta enfatisá ku nan no ta sostené ilegalidat. Sí nan ta duna muhé ilegal na peliger akohida, sin denunsiá nan. |
* E nòmber di Catelyn ta fingí i a kambia su bos. Su nòmber di bèrdat ta konosí serka redakshon.