WILLEMSTAD – Minister di Salubridat, Medio Ambiente i Naturalesa a enkargá Servisio Veterinario ku proposishon pa maneho, ehekushon di e maneho aki i ku supervishon, mantenshon, inspekshon i kòntròl. Hefe di e servisio Arnold Dwarkasingh ta 50 porshento doño tambe di e práktika di veterinario Parera i di Kunchi Medical Importers ku ta suministrá remedi pa bestia na veterinario lokal.
E kolaboradónan di Servisio Veterinario a tende di nan hefe ku nan no tin pèrmit pa papia ku prensa. Riba e pregunta si tin pèrmit pa filma den e matansa, minister di Salubridat, medio Ambiente i naturalesa Suzy Camelia-Römer ta reakshonna ku: ‘Ta ki tipo di horor esei ta?’ E ta sigui: “Si tin keho, por fabor komuniká ku mi.”
No tin base legal
Pero e matansa ta sosodé tras di porta será. E minister ta indiká ku ta e kabes di Servisio Veterinario mester mèldu abusu na e direktor di sektor di Ministerio di Salubridat, Medio Ambiente i Naturalesa, pa por kuminsá un trayekto di legislashon for di e Tim di Maneho na e ministerio. “Pa por krea un base legal pa por aktuá”, e minister ta bisa.
Aktualmente no tin e base legal pa supervishon di bienestar di animal. Anteriormente e aña aki un bishitante a filma hefe di e servisio Dwarkasing di un distansha miéntras ku e tabata hinka kachó den nan pulmon i kurason i inyektá nan ku un materia mortal. E total di diestres kachó tabata kompletamente na tinu i a muri gritando. Kolaboradó di Servisio Veterinario a pone e kachónan morto den un pikòp. Djis despues e vidio a resultá riba internet:
Tekst gaat verder na de video
Fuente Karen Soeters
No tin hustifikashon
Dwarkasing ta bisa ku e no ta haña nesesario pa reakshoná riba e vidio. E ta haña ku e no tin nodi di responsabilisá su mes pa e método ku ta prohibí na Hulanda i hopi otro pais, ku kastigu di privashon di libertat. “Sòru anto pa introdusí e lei ei na Kòrsou tambe”, e ta bisa. Mester a mata e kachónan ‘peligroso’riba òrdu di Ministerio Públiko (OM). OM ta bisa ku nan no ta disidí tokante e manera ku ta mata e kachónan.
Ta Dwarkasing mes ta e persona ku minister a duna òrdu pa vigilá i kontrolá. Na desèmber 2014 na abatuar na Parera pa promé bia a kontrolá porko di Kòrsou riba dioksina. Den diesshete di e diesocho muestranan tabatin un konsentrashon muchu haltu di e material ku ta kousa kanser. E kriadónan di porko parse tabata kompletamente ignorante tokante dioksina. Dwarkasing a avisá nan pa no kima plèstik banda di e porkonan.
‘Nos no por hasi mashá kontra dioksina den karni di porko
Hopi stal di porko na Kòrsou ta keda bou di huma di e refineria. Dwarkasing aña pasá a deklará na prensa ku e por hasi poko kontra dioksina den karni. Durante di e konferensha di prensa aña pasá a puntra Dwarkasing den presensia di minister Suzy Camelia-Römer kon e ta kombiná su funshon komo hefe di Servisio Veterinario ku su kompanianan. “Esei no ta problema”, el a bisa.
| Monopolio Kunchi Medical Importers, ku na 1994 e hefe di Servisio Veterinario di e tempu ei, Olav de Haseth, a lanta huntu ku Dwarkasing, na Kòrsou tin e monopolio di entre otro importashon di vakuna pa kachó for di Estádos Unídos. E veterinarionan na e isla ta haña nan mes fòrsá di kumpra vakuna serka Kunchi, òf importá vakuna for di Hulanda nan mes. |
Minister Camelia-Römer a indiká aña pasá ku Dwarkasing no ta e úniko ámtenar den su ministerio ku tin entrada adishonal. El a anunsiá ku e lo manda karta pa tur esnan envolví i duna nan e eskoho: sea keda traha pa gobièrnu, òf sigui komo empresario.
World Organization for Animal Health
Tòg e minister ke un investigashon di e manera di traha na abatuar na Parera. “Lo mi aserká World Organization for Animal Health, nos ta miembro. Esei ta parse mi mas mihó.” World Organization for Animal Health, OIE, ta keda na Paris.