Portrèt: Pixabay

AMSTERDAM – “Medionan di komunikashon hulandes t’ei solamente ora tin korupshon òf un desaster, pero pakiko no ta reportá nunka tokante desaroyo òf desigualdat na e islanan.” Esei tabata un keho ku a tende hopi durante e evento periodístiko ku Ret Karibense a organisá siman pasá.

Den kuadro di sinku aña di eksistensia Ret Karibense a kombersá ku representante di e medionan di notisia di mas grandi di emisoranan públiko i ku públiko mes. E preguntanan sentral tabata: ki lugá notisia karibense tin den e mundu di medionan di komunikashon hulandes? I ki lugá lo e mester tin?

E pènel di media di e anochi tabata konsistí di Lorenzo Fränkel (redaktor di Nieuwsuur), Dick Jansen (Hefe Eksterior NOS i René van Brakel (Redaktor hefe di EenVandaag).

Un fragmento di e diskushon di pènel (Na Hulandes)

Lorenzo Fränkel (Nieuwsuur) tin su ‘roots’ na Aruba i Sint Maarten. E ta rekonosé e malkontentu den komunidat karibense. “Esaki ta ekspresá espesialmente den deskonfiansa”, e ta konta. Ta berdaderamente e ‘default modus’ di Hulanda ora ta trata di e islanan: notisia negativo. Asina por ehèmpel mésora despues di orkan Irma media hulandes a reportá espesialmente tokante sakeo.”

Na redakshon di Nieuwsuur Fränkel ta mira su desendensia komo un balor èkstra: tòg mi ta mira kiko ta sosodé na e islanan ku otro wowo i mi por denotá esaki bon pa mi koleganan. Tambe mi ta dominá i komprondé e komunikashon i e formanan di komportashon di e islanan. Mi koleganan sin base karibense no tin esaki.”

Segun e direktor di Media i Industria Kreativo, Afke van Rijn, di Ministerio di Enseñansa i Kultura (OCW) pa e motibu ei ta importante pa reforsá e koperashon entre e otro medionan di komunikashon hulandes i Ret Karibense.

Ret Karibense

Na 2012 a lanta Ret Karibense i e ta parti di emisora públiko. Huntu ku reportero lokal na e islanan i na Hulanda e ret online ta trese aktualidat i informashon adishonal for di komunidat karibense na e islanan i na Hulanda.

Ministerio di Enseñansa i Kultura (OCW) ta finansiá e ret online direktamente. Pa 2019 a pone 300 mil euro disponibel pa reportahe na tur seis isla, di polítika na Den Haag i komunidat karibense na Hulanda.

‘Eksterior’
E islanan ta kompartí e mesun reino i pasaporte ku Hulanda i tòg serka e redakshonnan grandi di notisia di emisora públiko nan ta kai bou di redakshon di eksterior. Segun Dick Jansen di NOS esaki tin un kousa ‘puramente atministrativo’ i esei no ta influenshá e kantidat di atenshon ku ta duna na e islanan.

“E islanan apsolutamente ta forma parti di nos Reino pero tòg esaki no ta un motibu pa duna nan mas atenshon”, redaktor hefe René van Brakel (EenVandaag) ta agregá. “Nos no ta duna atenshon èkstra tampoko na Tiel òf munisipio di Sittard.”

Públiko indigná
For di públiko ta bini e remarke indigná ku asuntunan ku ta sosodé den e munisipionan karibense, manera e falta di determiná e mínimo di eksistensia, lo tabata notisia grandi si esaki a sosodé na Tiel òf Sittard.

Antje Diertens, parlamentario pa D66 ku kartera di Relashonnan den Reino tambe ta den públiko i ta añadí ku ‘e ta komprondé e sintimentu di públiko. “Mi mes ta bini di Groningen i ei tambe nan mester a bringa añanan largu pa prensa nashonal tende nan.”

Brakel ta mira otro posibilidat si pa mas atenshon pa komunidat karibense na e islanan i na Hulanda: “djòin nos Panel di Opinion di EenVandaag i laga bo bos zona, asina bo ta haña mas atenshon tambe.”

Sinku aña di eksistensia Ret Karibense (na Hulandes)