Portrèt: Sharina Henriquez

ORANJESTAD -“Stemmingmakerij.” E palabra Hulandes aki minister di Finansa di Aruba a uza pa cualifica e contenido di e carta mas recien di parti di organo di supervision financiero CAft. Den e carta aki e organo ta avisa Conseho di Minister di Reino pa duna gobierno di Aruba un instruccion y asina interveni. E mandatario tambe ta haya cu a bira tempo pa Hulanda duna Aruba mas espacio pa haci su trabou.

“Nos no por keda bou mama Hulanda pa semper. Y Hulanda no por keda bisa cu full e famia ta fout pasobra un yiu (e ta referi na Mike Eman, red.) a haci fout. Awor bo tin un yiu serio cu si ta haci e trabou. P’esey mi ta pidi: duna nos espacio pa haci nos trabou. No ta Hulanda ni CAft cu mester percura cu Aruba ta sali for di e situacion financiero dificil aki. Ta anos tin e deber pa traha pa e bienestar di nos muchanan. Si nos no a siña e lesa aki, eora nunca lo siñ’e tampoco.”

Carta di menasa
Minister Xiomara Maduro (MEP) no a aprecia e ‘carta di menasa’ aki cu a sali asina cerca  e reunion di e Conseho di Minister di Reino riba 5 juli unda nan lo atende e ley LAft cu ta traha e supervision financiero. Manera conoci parlamento di Aruba a cambia e ley aki pa asina e organo CAft no lo duna su consehonan mas na e Conseho di Minister di Reino sino na parlamento di Aruba mes.

Gobierno di Hulanda ta sinti cu esaki ta limita e control di supervision independiente riba e finansa di Aruba. Algo cu e mayoria parlamentario cual ta sostende e gobierno di Aruba ta desmenti pasobra nan ta haya cu a caba cu un construccion ilegal andando for di 2015 ora a institui e LAft y tambe CAft.

Awor cu e carta minister Maduro ta reacciona cu CAft a bin cu recomendacionnan invalido como cu esaki no a keda palabra den e protocolnan anterior entre Hulanda y Aruba. CAft a expresa su preocupacionnan mas tanto riba e gastonan personal di gobierno y e gastonan di cuido (AZV).

‘Nos no por scrap ambtenaar manera nan ta haci na Hulanda’- Xiomara Maduro, minister di Finansa

E mandatario den su reaccion sinembargo ta admiti cu awor tin riesgonan financiero extra pa gobierno su presupuesto di e aña aki. E ta menciona e trabou di overtime di e departamentonan uniforma pa proteha nos fronteranan awor cu e situacion na Venezuela. Ya esaki ta costa 5 miyon extra. E gastonan di cuido ta creciendo como cu nos populacion no ta den bon salud. E problema cu e malesa diabetes ta hopi grandi por ehemple.

“Pa motibo cu nos ta bin cu e suger tax”, e minister ta splica. Asina gobierno kier cubri gastonan di cuido parcialmente y traha preventivo. Tur esaki ta asuntonan conoci na CAft,  segun Maduro.

Den e  caso gobierno lo enfrenta buraconan financiero fin di aña, e pregunta ta si lo introduci medida manera impuesto nobo. “No”, e minister ta priminti, “y nos tampoco lo fia pa loco.” Sinembargo corta riba gastonan, manera di personal, tampoco gobierno lo mira esaki como opcion. “Nos no por scrap personal cu un firma manera nan ta haci na Hulanda. Nos no tin un red di sosten social aki banda. Kico eora nos mester haci cu e hendenan cu nos a kita?”

Pero e minister ta bisa cu e tin confiansa ni obstante e riesgonan extra. E cifranan financiero di e prome kwartaal tabata mustra bon, e ta bisa. “Locual IMF y CAft tambe a haya.” Si esaki ta un bon indicacion pa e resto di aña como ainda no ta conoci con e di dos kwartaal  a resulta y si gobierno realmente por logra suficiente reserva of corta gasto den e ultimo mita aña di 2019, ta algo cu tempo mester mustra ainda.