ORANJESTAD – Di biaha Quincy Dorff (12) a ripara cu algo no tabata bon ora e mester a siña pa su proefwerk aardrijkskunde cu na Zuid-Sudan ‘negronan’ ta bibando. “M’a bay mi mama di biaha pasobra esey no ta un bon palabra.” E juffrouw no a haci nada ora nan a trata e stof den klas, asina e tambe ta bisa.
“Mi ta den shock cu esaki ainda ta posibel na 2019”, su mama Gaye Dorff ta reacciona y el a actua di biaha. “Ora m’a puntra e juffrouw el a bisa cu e tampoco ta hay’e bon, p’esey e no ta uza e palabra den les.” Sinembargo el a keda para den e material pa e muchanan siña. Dorff a hala antencion di e cabesante di e scol, esta Prinses Amalia Basisschool pero e cabesante a bisa cu e no tabata na haltura.
Dorff ta bisa cu esaki ta straño como cu ya tabatin kehonan. “Ami a tende di otro mayornan cu dos aña pasa caba nan a keha riba mesun cos. Pero nada no a cambia.”
‘Mi no por controla tur stof’ – cabesante Roelien Hofman den su carta di disculpa
E cabesante mientrastanto a manda un carta pa e mayornan unda ta pidi disculpa. “Manera boso por compronde ta imposibel pa mi controla tur stof di tur vak riba contenido y mi ta confia den e manera di les cu e maestronan ta duna.” E cabesante Roelien Hofman ta skribi tambe cu el a pidi e maestronan pa controla e material di les bon.
Gaye Dorff ya a scrap e palabra ofensivo – potret: Sharina Henriquez
Pregunta ta keda: di unda e material ta bin y pakico e ta distribui ainda na e scolnan. E ta trata di un reader constisti di material copia sin fuente poni. Tur scolnan publico ta uzando e material aki den les di aardrijkskunde. Directiva di scolnan publico ta Dienst Publieke Scholen (DPS). Pero nan no a duna un comentario ainda.
Material bieu y discriminatorio
E muchanan mester siña cu na Africa nan ta traha cas di material natural – potret: Sharina Henriquez
Minister di enseñansa Rudy Lampe ta admiti cu scolnan ta uzando material hopi anticua. Como motibo e ta duna cu nunca a inverti suficiente pa drecha e situacion aki.
“Esaki ta completamente condenabel. Den leynan di enseñansa tambe ta uza palabranan cu no por, manera debielen. Esey no ta aceptabel. E ta mustra con anticua nos sistema di enseñansa y material di les ta awor.”
P’esey e innovation den enseñansa mester sigui, Lampe ta bisa cu kier implementa su plan nacional mas pronto posibel. E ta priminti tambe cu e lo atende cu DPS pa resolve e problema menciona ariba.
Dorff ta spera cu su keho lo yuda finalmente pa nan cambia e material. “Pasobra esaki ta duna un impresion masha malo mes, pa siña e muchanan esaki den zesde klas, kende ta bay scol secundario despues. Mi ta haya esaki no por.”