WILLEMSTAD – Por ta e skèn di bolita na Hato no ta dañá, manera alkalde di Rotterdam Ahmed Aboutaleb a pretendé siman pasá, pero no ta usa e skèner aktualmente tampoko.
Asina e bosero di duana na stashon Hato, Etienne Cacciano, ta bisa. Pakiko no ta usa e skèner, di esei e no por papia.
Siman pasá Aboutaleb tabata na Kòrsou di un bishita di trabou i a bisa NOS ku ‘mayoria di e skènernan di droga tantu den haf komo na e aeropuerto di Kòrsou tin añanan kaba ku nan ta dañá’. Ora informá ta sali ku tin un skèner so di bolita na Hato, i ta esun ei no ta usa aktualmente. E dos skènernan di kònteiner den haf ta dañá un aña kaba. Esei no ke men ku no ta kontrolá, Cacciano ta bisa.
Tim di Hato
“Na aeropuerto ta e tim di Hato ta aktivo”, segun Cacciano. E tim aki ta skrin pasahero riba buelo pa Oropa for di e momento ku nan check in te ora na drenta avion.” Kon esaki ta sosodé Cacciano no por bisa, pero e ta enfatisá ku e tim ta ‘di trein pa rekonosé gulidó di bolita’. E skrinmentu ta sosodé espesialmente riba karakterístika di aparensia.
E tim di Hato aktualmente ta konsistí solamente di duana. “Nos ta trahando riba ekspanshon di e tim ku miembronan di Kuerpo di Polis Kòrsou i Koninklijke Marechausse, manera tabata ántes.” Pasobra duana ta lucha ku un falta di personal.
Skèner di kònteiner dañá
Luthsel Lourens, kabes di e pòst di duana di haf ta bisa ku ta bèrdat ku e dos skènernan di kònteiner den haf tin un aña kaba dañá. Esei ke men ku e kòntròl di e kònteinernan ta sosodé ‘físikamente’. Pero solamente serka kònteiner ku ta importá. ‘Ta kontrolá kònteiner ku ta sali solamente si tin un tep di outoridatnan ku lo por haña droga den nan. Nos ta responsabel pa seguridat i salubridat di nos komunidat i p’esei nos ta kontrolá tur kònteiner ku drenta. Ta e destinashon ta responsabel p’esaki. Ke men kònteiner ku bai Rotterdam mester kontrolá aya.
Segun Lourens pronto lo drecha un di e skènernan di kònteiner. “Esaki lo spar trabou. Pero nos mester di un plan B. Den e 29 aña ku Lourens a traha pa duana regularmente el a topa droga den kònteiner. Segun e, e ora ei no ta trata di mas ku un kilo òf algun gram. “Na Kòrsou no ta produsí droga. Si bo kompará esaki ku Hulanda, ta relativamente tiki ta drenta via haf.”
Ministerio di Hustisia i OM no por bisa ainda kuantu trafikadó di droga a arestá e aña aki.
E skènernan di kònteiner i e skènernan pa importashon di kos na aeropuerto ta responsabilidat di duana, ku na su turno ta kai bou di ministerio di Finansa. Minister di Hustisia Quincy Girigorie ta solamente responsabel pa e skèner di bolita. E no ke duna komentario riba e skèner, pasobra ta trata di ‘informashon operashonal den relashon ku seguridat i búskeda di echonan kastigabel’.
“Buska i prevení transpòrt di droga via Kòrsou pa Hulanda tin e atenshon enfátiko di Hustisia i mester trata esaki konhuntamente den Reino. Kòrsou ta tuma su responsabilidat den esaki serio”, segun Girigorie den un reakshon kòrtiku.
